भैरहवा — लुम्बिनी क्षेत्रको पर्यटन प्रवर्द्धन तथा सीमापार समाचारका मुद्दामा बहस गर्ने उद्देश्यसहित शनिबारबाट बुद्ध जन्मस्थलमा तेस्रो समाचार महोत्सव अर्थात् लुम्बिनी न्युज फेस्टिवल सुरु हुँदैछ । 

रूपन्देहीस्थित लुम्बिनी प्रेस क्लबको आयोजनामा तीन दिन सञ्चालन हुने महोत्सवमा नेपाल र भारतका सञ्चारकर्मीको सहभागिता छ । यसअघि २०७६ र २०८० सालमा फेस्टिवल आयोजना गरिएको थियो ।

लुम्बिनी प्रेस क्लबका अध्यक्ष कमल रायमाझीले २०७६ मंसिरमा आयोजना गरिएको पहिलो फेस्टिवलमा काठमाडौंस्थित मूलधारका ५० भन्दा बढी सम्पादक तथा पत्रकार सम्बद्ध संस्थाका प्रतिनिधि र मुलुकभरबाट सञ्चारकर्मी गरेर तीन सय जनाको सहभागिता रहेको बताए । दोस्रो पटक स्थानीय रूपमा कार्यक्रम आयोजना गरिएको थियो । 

‘यसपटक भारतबाट मात्रै ४० जना पत्रकार सहभागी हुँदैछन्,’ उनले भने, ‘काठमाडौंबाट आधा दर्जन अग्रज पत्रकार सहभागी छन् ।’ उनका अनुसार भारतका सिक्किम, नयाँ दिल्ली, लखनउ, अयोध्या, काशी, गोरखपुर, महाराजगन्जबाट स्थानीय र राष्ट्रिय स्तरका पत्रकार सहभागी हुनेछन् । काठमाडौंबाट प्रेस काउन्सिल नेपालका अध्यक्ष, पत्रकार महासंघका अध्यक्ष र यसअघि कार्यक्रममा सहभागी नरहेका अग्रज पत्रकारलाई आमन्त्रित गरिएको छ । यसबाहेक चितवन, पोखरा र बर्दियाका पर्यटन तथा सञ्चारकर्मीको सहभागिता रहने रायमाझीले बताए ।