बर्दिया — राजापुर नगरपालिका–९ ईश्वरीगन्ज महिला टोलका सुन्दर थारुको पक्की घरको भित्ता गत वर्ष हात्तीले भत्कायो । संयोगवश दिनभर घर बसेपछि थारु सहित सपरिवार आफन्तको घर पाहुना कहाँ भोज खान गएका कारण मानवीय क्षति भएन ।

उनको पक्की घरको भित्ता हात्तीले भत्कायो । उनी हात्तीको त्रासले अन्यत्र बस्न थालेको पूर्व बरघर विष्णु चौधरीले बताए । हात्तीले एक वर्षयता यस गाउँका देवीलाल वली, शर्मिला थारु, मंगल थापा, विष्णु देवी खत्री लगायतका घरमा क्षति पुर्‍याएको बडघर चौधरीले बताए । 

हात्तीले यस साता विष्णुदेवी खत्री लगायत दर्जनौं किसानका गहुँ र तोरी बारीमा क्षति पुर्‍याएको छ । विष्णु देवीले यस साता लगातार चार पटक हात्तीले गहुँ र तोरी बालीमा क्षति गरेको बताइन् । ‘अब त बारीमा भएको क्षति हेर्न मन लाग्न छाड्यो,’ उनले भनिन्, ‘हात्तीको आतंकले किसानको बाली मात्रै होइन ज्यान जोगाउन गाहृो भयो ।’

एक दशक यता भारतीय सीमा कतरनियाघाट वन्यजन्तु आरक्षसँग जोडिएको ईश्वरीगन्ज, शंकरपुर र आसपासका क्षेत्र हात्तीको आक्रमणले धनजनको क्षतिले त्रास फैलाएको छ । दश वर्षयता यस क्षेत्रमा हात्तीको आक्रमणमा चारजनाको ज्यान गएको स्थानीयले बताए । स्थानीय घनश्याम खत्रीले हात्ती, बाघ र चितुवा नआएको दिनै नभएको बताए ।