रोल्पा — राष्ट्र बैंकका गभर्नर विश्व पौडेलले वित्तीय लगानी वृद्धि गरेर गरिबी हटाउन निर्देशन दिएका छन्। ग्रामीण आर्थिक अवस्थाको अनुगमन गर्ने क्रममा मंगलबार रोल्पाको लिबाङमा आइपुगेका गभर्नर पौडेलले लगानीकर्ता, वित्तीय संस्था एवं सेवाग्राहीबीचको अन्तरक्रिया कार्यक्रममा सहभागिता जनाउँदै यस्तो बताएका हुन् ।

कार्यक्रममा जिल्लामा रहेका बैंक र माइक्रोफाइनान्सका प्रमुख एवं प्रतिनिधिहरूको उल्लेख्य उपस्थिति थियो।त्यस अवसरमा उनले सबै खालका वित्तीय संस्थालाई उपलब्धिमूलक लगानीमा जोड दिन आह्वान गरेका हुन्।  

'साना तथा ठूला वित्तीय संस्थाबाट कृषिमा ऋण प्रवाह गर्ने नीति भए पनि ग्रामीण तहमा त्यसको प्रभाव देख्न पाइएन,' उनले भने, 'ग्रामीण जीवनलाई प्रत्यक्ष प्रभाव पार्ने गरी दरिलो अनुगमन गरेर मात्रै लगानी गर्नुहोस् । जब लगानी गरिन्छ भने सेवाग्राहीलाई फाइदा पुग्ने गरेर र लगानी डुब्न नसक्ने गरेर योजना बनाउनुपर्छ ।'

ग्रामीण जीवनलाई माथि उकास्न र ठूलो राजनीतिक परिवर्तनपछिको अवस्थाबारे बुझ्न पूर्वी पहाडी क्षेत्रमा भ्रमण र अनुगमन गर्न निस्केका उनीसहितको टोली रुकुम हुँदै पश्चिमी पहाडी क्षेत्रमा पनि पुग्नेछ। उनले बैंक र माइक्रो फाइनान्सलाई गरिबी घटाउन र जीवनस्तर उकास्ने उद्देश्यले लगानी गर्न ध्यानाकर्षण गराए। उनले लामो सशस्त्र द्वन्द्वका कारण ग्रामीण भेगमा लगानी हुन नसक्नुले यहाँको विकासमा नकारात्मक असर परेको स्वीकार गर्दै शान्ति प्रक्रियापछि पनि आशा गरेअनुसारको लगानी वृद्धि र उपलब्धि पाउन नसक्नु दुःखद भएको समेत बताए।