पूर्वी खण्डमा दुई सय मिटरभन्दा लामो पुलमध्ये  अरुणखोलाको पुल मात्र निर्माणको काम बाँकी रहेको छ । पुल निर्माण सम्पन्न भएको स्थानमा अहिले धमाधम एप्रोच सडकमा कालोपत्र गर्ने काम भइरहेको छ । 

अहिलेसम्म पूर्व र पश्चिम खण्ड दुवैतर्फ ७६ प्रतिशत काम सम्पन्न भएको आयोजनाले जनाएको छ । दाउन्ने खण्डबाहेक अन्य क्षेत्रमा यातायात सञ्चालन सहज भए पनि दाउन्नेमा भने यात्रुले सास्ती भोगिरहनु परेको छ । एकतर्फी यातायात  सञ्चालन गरेर दिन र रातमा पनि काम भइरहेको भए पनि दाउन्नेमा हरेक दिन यात्रुले जाममा बस्नुपर्ने बाध्यता छ । 

२०७५ माघमा काम सुर भएर २०७९ साउन २२ गते सम्पन्न गर्ने गरी चाइना स्टेट कन्स्ट्रक्सन कर्पोरेसन प्रालिले निर्माणको जिम्मा लिए पनि तीनपटकसम्म म्याद थप भएको छ । तेस्रो पटक थप भएको म्याद आगामी असार मसान्तमा सकिँदैछ । तर काम सम्पन्न हुनेमा  ठेकेदार र सरकारी पक्ष ढुक्क देखिँदैनन् । एसियाली विकास बैङ्कको ऋण सहयोगमा १ सय १४ किलोमिटर करिब १७ अर्बको लागतमा विस्तार भइरहेको हो ।