महाराज प्रेस क्लबका अध्यक्ष अमित त्रिपाठीले यसअघ लुम्बिनी प्रेस क्लबसित सहकार्यमा सीमा क्षेत्रमा रहेर नेपाल र भारतका धार्मिक, ऐतिहासिक र पर्यटकीय मुद्दामा समाचार सम्प्रेषणका साथै आपसी सद्भाव वृद्धिका क्रियाकलाप सञ्चालन गरिँदै आएको जानकारी गराए । यसपटक परम्परादेखि भाषा, संस्कृति, शिक्षा र राजनीतिको केन्द्रको रुपमा रहेको बनारस क्षेत्रको अध्ययन भ्रमणका लागि संयुक्त रुपमा आएको बताए । ‘दुवै मुलुकका पत्रकार काशी क्षेत्र अध्ययन भ्रमणमा आउँदा काशी पत्रकार संघलाई भुल्न सकेनौं,’ उनले भने, ‘यहाँ आएर छलफल गर्दा पत्रकारितामात्र संस्थागत विकासका बारेमा पनि सिक्ने अवसर मिल्यो ।’

लुम्बिनी प्रेस क्लबका अध्यक्ष कमल रायमाझीले नेपालका पत्रकारको छाता संगठनका रुपमा पत्रकार महासंघ भए पनि स्वतन्त्र रुपमा गठित प्रेस क्लबले पत्रकारको क्षमता अभिवृद्धि र उनीहरुलाई स्वदेश र विदेशका महत्वपूर्ण स्थानको भ्रमण गराएर लेखन क्षमता विकास र ज्ञानको दायरा वृद्धिमा भूमिका खेल्दै आएको बताए । 'यस क्रममा विदेशमा रहेका प्रेस क्लबसित भगिनी सम्बन्ध कायम गर्दै आएका हौैं,' उनले भने ।

प्रेस क्लबले अहिलेसम्म भारतको सिक्किम प्रेस क्लब, महाराज प्रेस क्लबसित भगिनी सम्बन्ध कायम गरिसकेको छ । काशी पत्रकार संघसित पनि समन्वय र सहकार्यका लागि आइतबार भेटघाट गरिएको उनले बताए ।