बुटवल — एमालेको ११औं महाधिवेशनका लागि लुम्बिनीमा अन्यत्र जस्तो रस्साकस्सी देखिएको छैन । केन्द्रीय उच्च तहमा रहेका मुख्य नेता नै नखुलेपछि विद्या भण्डारी र ईश्वर पोखरेलको समूह लुम्बिनी प्रदेशमा कमजोर देखिएको छ । 

एमालेले बिहीबारदेखि ११ औं अधिवेशनका लागि प्रतिनिधि छनोट सुरु गरेको छ । बिहीबार प्रदेशका सबै जिल्लामा प्रतिनिधि छनोटका लागि मनोनयन दर्ता गर्ने कार्यतालिका छ । एमाले लुम्बिनी प्रदेश कमिटी अध्यक्ष राधाकृष्ण कँडेलका अनुसार लुम्बिनी प्रदेशमा मात्र एमालेका ८२ हजार १ सय ३५ संगठित सदस्य रहेका छन् । तीमध्येबाट भूगोल, कमिटी र जनसंगठनबाट गरी १ सय ९० जना प्रतिनिधि चयन हुँदैछन् । 

लुम्बिनी प्रदेशबाट उपाध्यक्षमा विष्णु पौडेल र युवराज ज्ञवाली, महासचिव शंकर पोखरेल, उपमहासचिव प्रदीप ज्ञवाली, सचिवहरू गोकर्ण विष्ट, छविलाल विश्वकर्मा, टोपबहादुर रायमाझी छन् । रायमाझी निलम्बनमा परेपछि अहिलेको कार्यसमितिमा ६ पदाधिकारी छन् । तर, तीमध्ये अहिलेसम्म कुनै पनि नेता विद्या भण्डारी र ईश्वर पोखरेल पक्षमा नखुलेकाले सिंगो लुम्बिनी प्रदेशमा केपी ओली पक्ष नै हाबी देखिएको छ । यद्यपि प्रतिनिधि छनोट भएपछि धेरैले कित्ता परिवर्तन गर्न सक्ने आशंका नेताहरूमा छ । 

एमाले प्रदेश अध्यक्ष कँडेलका अनुसार लुम्बिनीबाट हरेक ३ जना प्रतिनिधिमध्येबाट १ महिना अनिवार्य गरिएको छ । त्यसरी छनोट गर्दा ५३ जना महिला, १९ जना दलित र ४० वर्षमुनिका कम्तीमा २६ युवा अनिवार्य छनोट हुनेछन् । खुल्ला पदमा ८० जना निर्वाचित हुने व्यवस्था छ । प्रदेश कमिटीबाट ५ र मजदुर संगठनबाट ७ जना छनोट हुँदा १ सय ९० जना प्रतिनिधि ११ औं अधिवेशनमा सहभागी हुने अध्यक्ष कँडेलले बताए । ‘प्रतिनिधि छनोटमा कुनै रस्साकस्सी छैन,’ उनले भने, ‘छनोट भइसकेपछि के हुन्छ, त्यो उनीहरूकै कुरा भयो ।’ उनले सकेसम्म धेरै जिल्लामा सर्वसम्मत रूपमै प्रतिनिधि चयन हुने र नमिलेका जिल्लाहरूमा मात्र निर्वाचन प्रक्रियाबाट छनोट हुने बताए ।

रुपन्देहीका एक एमाले नेताका अनुसार अहिले उपाध्यक्ष विष्णु पौडेल मौन देखिएको र अलिअलि खुलेका सचिव गोकर्ण विष्टले पनि प्रभावकारी भूमिका निर्वाह नगरेकै कारण विद्या पक्षधरहरू मौन बसेको बताए । ‘प्रतिनिधि छनोटअघि नै रस्साकस्सी गर्दा छनोट नै नहुने अवस्था बुझेकाले धेरै मौन बसेर प्रतिनिधि चयनमा सहभागी हुने प्रयासमा भएको देखिन्छ,’ उनले भने, ‘त्यसपछि बल्ल रस्साकस्सी सुरु हुने हो ।’