बुटवल — नेकपा एमालेका महासचिव शंकर पोखरेलले फागुन २१ को निर्वाचनको पैरवी नै नगर्ने बताएका छन् । उनले निर्वाचन हुने वातावरण नै तयार नगरेको र सरकारको ध्यान पनि निर्वाचनलाई निष्पक्ष बनाउनेतर्फ नरहेको तर्क गरे ।

प्रेस चौतारी नेपाल, रूपन्देहीले सोमबार बुटवलमा गरेको भेटघाट कार्यक्रममा महासचिव पोखरेलले विश्वासयोग्य वातावरण बनेको अवस्थामा भने एमाले चुनावबाट नभाग्ने पनि दाबी गरे । ‘नहुने निर्वाचनको पार्टीले पैरवी किन गर्ने ?,’ उनले भने, ‘सरकारका क्रियाकलाप निर्वाचन गर्नेतर्फ छैनन्, निर्वाचन आयोगले भन्दैमा चुनाव हुन्न ।’ केही राजनीतिक दलले जेन–जी रिसाउलान् भन्ने डरले चुनाव चुनाव भनेको उनले बताए । यो सरकार चुनाव गराउनका लागि नबनेको पनि उनको दाबी थियो । 

‘एमालेको स्पष्ट अडान छ । यो सरकार चुनावका लागि होइन, निर्वाचन गराउँदा पनि गराउँदैन । २०५९ जस्तो वैधता नपाउने चुनावको अर्थ छैन,’ उनले भने, ‘चुनावको लागि महत्त्वपूर्ण शक्ति प्रहरीको हतियार खोसिएको र त्यसले कमजोर बनेको प्रहरीको मनोबल उकास्ने काममा सरकारले ध्यान दिएकै छैन ।’ कैदीबन्दी र प्रहरीका लुटिएका हतियारले त्रसित बनेको नागरिक समाज र प्रहरी डरको मनोविज्ञानबाट बाहिर ननिस्कँदासम्म चुनाव हुने सम्भावना नरहेको उनको भनाइ थियो । 

राजनीतिक दलसँग संवाद र छलफल गर्न नखोज्नुले पनि सरकारले चुनाव गराउन चाहँदैन भन्ने स्पष्ट रहेको पोखरेलको दाबी थियो । अहिलेको चुनौतीपूर्ण क्षणको निकास प्रतिनिधिसभा पुनःस्थापना भएको पनि उनले स्पष्ट पारे । पोखरेलले एमाले चुनावबाट भाग्ने पार्टी नभएको तर अहिलेको चुनौतीपूर्ण अवस्थाको निकास प्रतिनिधिसभा पुनस्थापना भएको तर्क गरे ।