खाद्य तथा व्यवस्था व्यापार केन्द्रको हातामा यसअघि धान बिक्री गर्न आएका किसानलाई भित्र प्रवेश गर्न दिई टोकनको व्यवस्था गरेकोमा अहिले सडकमै राख्न दिइएको छ । जसले गर्दा सडक जाम जस्तै भएको छ।
What you should know
बर्दिया — राजापुर नगरपालिका–३ का तिघ्राका किसान विनोद थारु थारु बुधबार बिहान ४ बजे खाद्य तथा व्यवस्था व्यापार केन्द्र राजापुरको मुलद्वारमा पुग्छन् । धान बेच्ने पखाईमा बसेका उनी तीनरात चार दिन बित्यो । तर पालै पाएका छैनन् ।
उनी जस्तै राजापुर नपा–३ प्रयागपुरका पन्टु थारुले सडकमै तीन रात कटाएर बसे पनि पालो नआएको बताए । राजापुरस्थित खाद्य व्यापार केन्द्रबाहिर करिब १ किमीसम्म वयलगाडा र टयाक्टरमा सयौं किसान धान बिक्री गर्ने पखाईमा बसेका छन् ।
खाद्य तथा व्यवस्था व्यापार केन्द्रको हातामा यसअघि धान बिक्री गर्न आएका किसानलाई भित्र प्रवेश गर्न दिई टोकनको व्यवस्था गरेकोमा अहिले सडकमै राख्न दिइएको छ । जसले गर्दा सडक जाम जस्तै भएको छ ।
धान बेच्न आएका किसान ३/४ दिनसम्म पालो पर्खिदा खाना, नास्ताको खर्च भइरहेको गुनासो पोखेका छन् । कतीपय किसानले खर्च धान्न नसकेर व्यापारीलाई खाद्यको मूल्य भन्दा ४ सय रुपैयाँ कम मूल्यमा धान बेचेका छन् । लामो समयसम्म पालो कुर्नुपर्दा खाना खाने रकम नहुँदा बाध्य भई १ क्विन्टल धान सस्तोमा बेचेको पन्टु थारुले बताए ।
कैलालीका किसान पनि धान बिक्री गर्न यहाँ आएका छन् । कैलाली टिकापुर नगरपालिकाका जिवन थारुले बुधबार बिहान २ बजे बयलगाडामा आउँदा ३ घण्टा लागेको बताए । धान बिक्री गर्न खाद्य व्यवस्थापन कार्यालय, राजापुरमा आए पनि शुक्रबार बेलुकीसम्म पालो नपाएको बताए ।
उनी जस्तै यहाँका किसान लडिया र ट्याक्टरमा धान बिक्री गर्न यहाँ दैनिक आइपुग्छन् । गल्ला व्यापारीले प्रति क्विन्टल मोटा धान २ हजार ७ सयसम्म खरिद गर्दै आएका छन् । मध्यम ३ हजार १ सयसम्म खरिद गर्ने गरेको किसानले बताए ।
खाद्यले धान खरिद गर्दा गुणस्तरदेखि वडा कार्यालयको सिफारिस लगायतका प्रक्रिया पुरा गर्दा समय बढी खर्चिँदा खरिद कार्य ढिलासुस्ती हुने गरेको राजापुर–१ का किसान लौटन थारुले बताए । थारु ढिलै भए पनि किसानले खाद्य संस्थानमा बेच्दा व्यापारी भन्दा राम्रो मूल्य पाएको बताउँछन् । ‘बिहानको चिसोमा करिब तीन किलोमिटर दूरीबाट धान बेच्न आएका छौं,’उनले भने, ‘धान बेच्ने प्रक्रिया झन्झिटिलो छ ।’
उनी जस्तै राजापुर–६ का किसान नाचु चौधरीले सरकारले ढिलो रकम पठाएको र चिसो बढेका कारण धान बेच्न आउँदा सास्ती भोग्नुपरेको बताए । बिहानै अँध्यारोमा खाद्य केन्द्रमा आउँदा अरु पनि लाइन लगाएर मुलद्वार भित्र प्रवेश पाउने हतारमा हुने गरेको उनले सुनाए । ‘भित्र पुगेपछि पालो कुर्दै निकै समय खर्चिनु परेको छ,’ उनले भने, ‘वर्ष भरी परीश्रम गरी उब्जाएको धान बिक्री गर्न आउँदा सकस भएको छ ।’
खाद्य तथा व्यापार व्यवस्था केन्द्र, राजापुरले गत कात्तिक १९ गतेदेखि धान खरिद गर्दै आएको छ । खाद्य तथा व्यापार केन्द्रमा शुक्रबार बेलुकीसम्म १ हजार ९ सय ५० क्विन्टल बढी धान खरिद गरेको जनाएको छ । खाद्य केन्द्रले यस वर्ष ३० हजार क्विन्टल धान खरिद गर्ने भएको सूचना अधिकारी चेतमान कठायतले बताए ।
यसवर्ष सरकारले मोटा धान ३ हजार ४ सय ६३ रुपैयाँ ८१ पैसा र मसिनो ३ हजार ६ सय २८ रुपैयाँ ३३ पैसा मूल्य तोकेको छ ।
