नेपालगन्ज — बाँकेको डुडुवा गाउँपालिका–६ हिर्मिनियाका ६ वर्षीय दीपेश चमारलाई आइतबार स्कुल अगाडि घोडामा सामान ओसार्ने ठेलाले ठक्कर दियो । अचेत बनेका बालकलाई विद्यालय र परिवारजनले भेरी अस्पताल पुर्‍याए ।

पुगेलगत्तै अस्पतालले उपचार सम्भव नहुने भन्दै सञ्जीवनी अस्पताल (नर्सिङ होम) लैजान सुझायो । बीपीचोकस्थित सञ्जीवनी अस्पताल पुर्‍याउँदा चिकित्सकले उनलाई मृत घोषणा गरिदिए । यी दुई अस्पतालको दूरी करिब एक किलोमिटर छ । 

आफ्नो नातिको पोस्टमार्टमका लागि अस्पताल परिसरमा रहेकी हजुरआमा गीता चमारले अस्पतालमा ल्याउँदासमेत उपचार नगर्दा बाटोमै नाति गुमाउनु परेको बताइन् । उनले भनिन्, ‘उपचार गरेर हेरेको भए पनि मन शान्त हुन्थ्यो बाटोमै नाति गुमाउनु पर्‍यो ।’

आइतबार दिउँसो २ बजे डुडुवा–६ हिरमिनिया बकौली सिक्खनपूर्वाको सामुदायिक विद्यालयमा कक्षा १ मा पढ्ने ६ वर्षीय दीपेशलाई विद्यालयकै अगाडि उभिएको अवस्थामा बग्गी (घोडा गाडी) ले ठक्कर दिएको थियो । खाजा खाने समयमा विद्यालय बाहिर निस्किएका ती बालक घण्टी लाग्दा पनि बाहिरै थिए ।

घटनापछि विद्यालय प्रशासनले र परिवार मिलेर नेपालगन्जस्थित भेरी अस्पतालमा पुर्‍याएका थिए । ‘भेरी अस्पतालमा बच्चा पुग्दा बच्चा जीवितै थियो । रिफर गर्नुको साटो भेरी अस्पतालले तुरुन्त उपचार सुरु गरेको भए बाँच्ने सम्भावना प्रबल थियो,’ सामाजिक अभियन्ता रुबी खानले भनिन्, ‘सरकारी अस्पतालमा अरु बालबालिकाको अवस्था पनि यस्तै छ । भेरी अस्पतालमा आईसीयु बेड पाइँदैन सबै प्याक छ भन्ने जानकारी दिइन्छ तर डाक्टरका क्लिनिकका बिरामीका लागि बेड अग्रिम बुक हुन्छ ।’

भेरी अस्पताल नेपालगन्जका सूचना अधिकारी संकेत रिसालले बालकको अवस्था गम्भीर रहेकाले अरु अस्पतालमा रिफर गरिएको बताए । ‘मैले अस्पतालको ड्युटीमा रहेका डाक्टरसँग कुरा गर्दा बच्चाको अवस्था गम्भीर थियो । अस्पतालमा सिटी स्क्यान छैन । न्यूरोको डाक्टर पनि हामीसँग नभएकाले भेरी अस्पतालमा उपचार सम्भव छैन भनेर परिवारलाई जानकारी गराएको भन्नुभएको थियो,’ उनले भने, ‘आवश्यक उपकरण नै नभएपछि बिरामीको उपचार गर्न सम्भव हुँदैन ।’