करिब १ सय ५० जना व्यक्ति आइतबार साँझ आएर जग्गामा बसिरहेको जानकारी पाएको कपास विकास समितिका कार्यकारी निर्देशक वीरेन्द्रराज पराजुलीले बताए । ‘अहिले राति भइसकेको छ, सीडीओलाई पनि जानकारी गराएका छौं,’उनले भने,‘त्यस जग्गाको लालपुर्जा हामीसँग छ । तर, कुन उद्देश्यले कहाँका व्यक्ति आएर त्यस जग्गामा बसेका हुन् बुझ्न सकिएको छैन ।’

सशस्त्र द्वन्द्वका समयमा माओवादीले उक्त जग्गा कब्जा गरेको थियो । ०६४ सालमा सशस्त्र प्रहरीले मा‌‌ओवादी अतिक्रमण हटाएर आफ्नो क्याम्प राखेको थियो । करिब चार वर्षअघि सशस्त्रको क्याम्प अन्यत्र स्थानान्तरण गरेर कपास विकास समितिलाई जग्गा जिम्मा लगाइएको हो । 

कपास विकास समितिको जग्गामा अहिले अनधिकृत व्यक्तिहरू आएर बसेको जानकारी पाउने बित्तिकै बुझ्नलाई प्रहरी पठाएको प्रमुख जिल्ला अधिकारी गोगनबहादुर हमालले बताए । ‘आज मात्र सरुवा भएर आएको छु,’उनले भने,‘के भएको हो बुझ्दैछु । कानुनविपरीत जाने छुट कसैलाई छैन ।’