राईले आफ्नै कार्यकक्षमा बसेर सदस्य–सचिवको काम सुरु गरिसकेको उनले बताए । यता कर्मचारीको पनि अनौपचारिक बैठक बसेर राईकै नेतृत्वमा विनियमावली अनुसार कामकाज गर्न अघि बढ्ने निर्णय गरिएको थियो । राईले प्रचलिन ऐन कानुन, नियमको परिधिभित्र रही विनियमावलीलाई आधार मानी कामु सदस्य–सचिवको काम थालिसकेको बताए । ‘आफूले पाएको जिम्मेवारीलाई इमानदारीका साथ पूरा गर्नेछु,’ उनले भने, ‘लुम्बिनीका बाँकी काम पूरा गरेर यसलाई विश्वकै महत्त्वपूर्ण आस्था र धरोहर तथा शान्तिको सहर बनाई पर्यटकीय गन्तव्य बनाउन लागिपर्नेछु ।’ 

लुम्बिनी विकास कोषका उपाध्यक्ष ल्याहारक्याल लामा विदेशबाट भर्खर फर्केका छन् । शनिबार लुम्बिनी आएर कामु सदस्य–सचिव राईलाई औपचारिक पत्र दिइने कोषका सदस्य श्याम रोक्काले बताए । 

संस्कृति, पर्यटन तथा नागरिक उड्डयन मन्त्रालयको सिफारिसमा मन्त्रिपरिषद् बैठकबाट कोषको सदस्य–सचिव नियुक्त हुने प्रावधान छ । तर, मन्त्रालयले नै अझै मन्त्री पाउन सकेको छैन । सरकार अनावश्यक खर्च कम गर्ने भनिरहेका बेला तत्कालै सदस्य–सचिव नियुक्त हुने सम्भावना कम रहेको बताइन्छ ।

सदस्य–सचिव अधिकारसम्पन्न कार्यकारी पद हुँदा नियुक्तिका लागि निकै रस्साकसी हुने गर्छ । कोषले कपिलवस्तु, रूपन्देही र पश्चिम नवलपरासीका बुद्धसँग सम्बन्धित ऐतिहासिक, पुरातात्त्विक र सांस्कृतिक स्थलको संरक्षण, उत्खनन, विकास र पर्यटन प्रवर्द्धन गर्दै आइरहेको छ ।