बर्दिया — गुलरिया नगरपालिका अन्तर्गत राखिएका दुर्गा देवीको मूर्ति बिसर्जन गरिँदैछ । घटस्थापनाका दिनदेखि गाउँ गाउँ, चोक चौराह र विभिन्न मन्दिर प्राङ्गणमा स्थापना गरिएका दुर्गा देवीको मूर्ति आज(बिहीबार) बिसर्जन गर्न लागिएको हो । 

गुलरिया नगरपालिका–६ भन्सार रोडमा बिहीबार बिहानदेखि बध गर्न रावण ठडाइएको छ । ठडाइएको रावणको बधपछि गुलरिया अन्तर्गत राखिएका दुर्गा देवीको मूर्ति धुमधाम भादा नदीमा बिसर्जन गर्ने भक्तजनहरुको तयारी छ ।

गुलरिया नगरपालिका–६ भन्सार रोड स्थित गौरीशंकर मन्दिर र गुलरिया नगरपालिका–५ मातङ्गी देवी मन्दिरको प्राङ्गणलगायत गुलरियाका विभिन्न गाउँ र चोक गरी ९३ ठाउँमा दुर्गा देवीको मूर्ति राखिएको छ । 

घटस्थापनादेखि दुर्गा देवीको मूर्ति राखिएको ठाउँमा पुरोहितद्वारा नवरात्रभर विधिवत रुपमा पूजापाठ गरिएको थियो । घटस्थापनाका दिन स्थापना गरिएका दुर्गा देवीको मूर्तिको साँझ, बिहान र दिउँसो पूजाआजा, आरती र भजन किर्तन गर्ने भक्तजनहरुको घु‍इचो लाग्ने गरेको थियो ।

नवरात्रमा स्थापना गरिएको दुर्गा माताको मूर्तिले गाउँघरमा चहल पहल रहेको गुलरिया नगरपालिका–७ का जय यादवले बताए । ‘नवरात्रभर ‘जय माता दी’ले गाउँघर गुन्जायमान बनेको थियो,’ उनले भने, ‘चारैतिर पूजाआजा गर्ने भक्तजनहरुको घुँइचो देखिन्थ्यो, आज विभिन्न ठाउँमा राखिएका दुर्गा माताको मूर्ति बिर्सजनपछि गाउँघर सुनसान हुनेछ ।’