पाल्पा — तानसेन नगरपालिका–८, छापका ताराबहादुर रानाले ४० वर्षअघि देखेको सीपलाई प्रयोग गरेर यस वर्ष छाप देउरालीमा चर्खे पिङ राखेका छन् । गाउँका नयाँ पुस्ताका युवालाई साथ लिएका रानाले एक साताको मिहिनेतपछि चर्खे पिङ तयार भएको बताए ।

सबैतिर राख्न काठ नपाएपछि फलामको मिश्रण गरिएको छ । ‘उहिले देखेको सीपलाई सम्झेर नयाँ पुस्तालाई सिकाउन यसवर्ष चर्खे पिङ बनाइयो,’ उनले भने । 

पिङ बनाउन काठको ठूलाठूला दुई वटा पोल आवश्यक पर्छ । त्यसको बाहा, पखेटा, फल्याक, बलोलगायत धेरै काठ आवश्यक हुने गर्छ । रानाले बलोको स्थानमा भने फलाम र घुमाउन सजिलो होस् भनेर बेरिङ राखेर नयाँ अभ्याससमेत गरेको बताए । ‘हाम्रा बाउबाजेले टोलटोलमा यस्ता चर्खे पिङ राख्नुहुन्थ्यो,’ उनले भने, ‘अहिलेका पुस्तालाई यसबारेमा थाहासमेत छैन । त्यसैले पनि जानेको सीप प्रयोग गरेर निर्माण गरेका छौं । सोंचेको जस्तो राम्रो नहोला तर बन्न चाहि बनेको छ ।’ 

पछिल्लो समयमा जंगलमा काठ काट्न पाइँदैन । काठ धेरै लाग्ने भएकाले निजी जंगलको पनि काठ काट्न अनुमति पाउन मुस्किल  छ । त्यसपछि यो पिङ बनाउन पनि झन्झट हुने भएकाले आजकाल चर्खे पिङ नै राख्न छाडेको तानसेन नगरपालिका–८, छाप देउरालीका स्थानीय युवा तुषार रानाले बताए ।