भैरहवा — जेन-जी आन्दोलनका क्रममा भएको प्रदर्शन, तोडफोड र आगजनीपछि सुनसान बनेको रुपन्देहीमा आइतबार बिहानैबाट चहलपहल सुरु भएको छ ।

शनिबार राति जिल्ला प्रशासनले अनिश्चितकालीन कर्फ्यु र निषेधाज्ञा हटाएपछि बिहान जिल्लाका बजार, स्वास्थ्य तथा शैक्षिक संस्था र व्यापारिक प्रतिष्ठान खुलेका छन् । बिहानैदेखि जिल्लाका प्रमुख र भित्री सडकमा ठूला र हलुका सवारी साधनको बाक्लो ओहोरदोहोर देखिन्छ ।

प्रमुख जिल्ला अधिकारी टोकराज पाण्डेले सूचना जारी गरेर जिल्लामा शान्ति सुरक्षाको अवस्था सामान्य रहेकाले निषेधाज्ञा र कर्फ्यु आदेश हटाइएको जनाएका छन् । शनिबार दिउँसो निषेधाज्ञा जारी रहेका कारण मुख्य बजार क्षेत्र खुलेका थिएनन् । सहरका भित्री र ग्रामीण क्षेत्रका अत्यावश्यक सामग्रीका पसल र हाट बजार मात्र सञ्चालनमा थिए । प्रशासनले नै शान्ति व्यवस्था कायम रहेको सूचना जारी गरेर जनजीवन सामान्य बनाउन आह्वान गरेपछि स्थानीयले निर्धक्क आफ्ना पसल र प्रतिष्ठान सञ्चालन गरेका हुन् । 

एक सातादेखि बन्द जिल्लाभरका विद्यालय पनि आइतबारबाट सञ्चालनमा आएका छन् । शनिबार साँझ प्याब्सन जिल्ला अध्यक्ष दीपक खनाल, नेसनल प्याब्सन अध्यक्ष बाबुराम बञ्जाडे र हिसान रुपन्देहीका अध्यक्ष कृष्णबहादुर न्यौपानेले प्रेस विज्ञप्ति जारी गरेर विद्यालय सञ्चालनमा ल्याउन आह्वान  गरेका थिए । मुलुकमा सिर्जित असामान्य परिस्थितिपश्चात् शैक्षिक क्षेत्र प्रभावित भएकाले अभिभावक, विद्यार्थी, शैक्षिक समुदायको चासो र भविष्यलाई ध्यानमा राख्दै आइतबारदेखि नियमित रुपमा विद्यालय सञ्चालन गर्ने निर्णय गरिएको जनाएका छन् ।