जिल्ला प्रशासनको निर्णय अनुसार असोज १ देखि एकीकृत जाँच बिन्दुबाट पुनः सेवा सञ्चालनमा आउने भएको छ।
What you should know
भैरहवा — भारतलगायत मुलुकबाट भित्रिने पर्यटकका लागि आवश्यक सुरक्षा जाँचलगायत सुविधा एउटै बिन्दुबाट प्रदान गर्न रुपन्देहीको सिद्धार्थनगर–१ स्थित बेलहिया नाकामा स्थापना गरिएको एकीकृत जाँच बिन्दु (आइसीपी) असोजबाट सञ्चालनमा आउने भएको छ ।
भारतलगायत तेस्रो मुलुकबाट आउने पर्यटकको सहजताका लागि डेढ वर्षअघि उक्त बिन्दु सञ्चालनमा ल्याइएको थियो । सुरक्षा लगायत जाँचका नाममा विदेशी पर्यटकले भोग्नुपरेको हैरानी कम गर्न भन्सार बिन्दुमा यस्तो सेवा सुरु गरिएको थियो । तत्कालीन गृहसचिव एकनारायण अर्यालले यसको उद्घाटन गरेका थिए । उक्त बिन्दुमा सुरक्षा लगायत जाँच पूरा गरेपछि पर्यटक सवार गाडीलाई स्टिकर दिने गरिएको थियो । उक्त स्टिकर हेरेपछि जिल्लाका अन्य ठाउँमा सुरक्षा जाँच गरिँदैनथ्यो ।
जिल्ला प्रशासनमा मंगलबार बसेको सर्वपक्षीय बैठकले असोज १ गतेदेखि पुनः एकीकृत जाँच बिन्दुबाट सेवा सञ्चालनमा ल्याउने निर्णय गरेको हो । प्रमुख जिल्ला अधिकारी (प्रजिअ) टोकराज पाण्डेले एकीकृत जाँच बिन्दु सञ्चालनमा देखा परेका चुनौती र समस्याबारे छलफलपछि चेकजाँच बिन्दुलाई व्यवस्थित तुल्याएर पर्यटकको सहजताका लागि सेवालाई निरन्तरता दिने निर्णय गरिएको जानकारी दिए । यसको कार्यान्वयनका लागि सरकारी निकाय र पालिकाबीच कार्यविभाजन समेत गरिएको छ ।
प्रजिअ पाण्डेका अनुसार लुम्बिनी प्रदेशस्थित उद्योग, पर्यटन तथा यातायात मन्त्रालयले उक्त बिन्दुका लागि आवश्यक जनशक्ति व्यवस्थापन गर्ने, आवश्यक निकायसँग समन्वय र स्टिकर उपलब्ध गराउने र आवश्यक साधनस्रोतको व्यवस्था गर्ने सहमति भएको छ । जिल्ला प्रशासनले सुरक्षा, प्रभावकारी व्यवस्थापन र समन्वयका साथै नियमित अनुगमन, मूल्याङ्कन र समन्वय गर्ने जनाएको छ ।
सिद्धार्थनगर नगरपालिकाले चेकजाँच कक्षका लागि आवश्यक पूर्वाधार निर्माण गर्ने, खानेपानी र सरसफाइको उचित प्रबन्ध गर्ने, सीमा क्षेत्रमा सौन्दर्यकरण गर्ने र आवश्यकता अनुसार साधनस्रोत उपलब्ध गराउने सहमति जनाएको छ । जिल्लास्थित सुरक्षा निकायले जाँच गरेपछि स्टिकर जारी गर्ने, जाँचका लागि आवश्यक जनशक्ति उपलब्ध गराउने र अन्तरनिकाय समन्वय गर्ने जिम्मेवारी लिएका छन् । भैरहवा भन्सार कार्यालयले परिसरको सौन्दर्यकरण गर्ने, सेवाग्राहीमैत्री संरचना निर्माण गर्ने जनाएको छ ।
‘यसबाहेक जाँच बिन्दुबाट प्रवाह गरिने सेवाको अनुगमन गर्न जिल्ला समन्वय प्रमुखको संयोजकत्वमा समिति गठन गरिएको छ,’ प्रजिअ पाण्डेले भने, ‘समितिमा नगरप्रमुख, प्रमुख जिल्ला अधिकारी, प्रदेश पर्यटन सचिव, प्रहरी प्रमुखहरू र भैरहवा भन्सार प्रमुख रहेका छन् ।’ सबै निकायबीच समन्वय गरेर पर्यटकका लागि सहज वातावरण तयार गर्ने सहमति बनेको उनले बताए ।
