जमुवार खोला पुलछेउमा मंगलबार बिहान भेटिएको भनिएको शंकास्पद वस्तु पूजा सामग्री राखिएको नरिवल रहेको पाइएको छ ।
कपिलवस्तु — यशोधरा गाउँपालिका वडा नं १, रंगपुरतिर जाने जमुवार खोला पुलछेउमा मंगलबार बिहान भेटिएको भनिएको शंकास्पद वस्तु पूजा सामग्री राखिएको नरिवल रहेको पाइएको छ । नरिवल, काइँयो, सुपारी, टीका र पूजासामग्री भेटिएको जिल्ला प्रहरीका सूचना अधिकारी डीएसपी रिपेन्द्रकुमार सिंहले बताए ।
रातो कपडाले बेरेर राखेका हुनाले स्थानीय त्रसित बनेका थिए । सेनाको बम डिस्पोजल टोलीले यान्त्रिक उपकरणले पहिचान गर्दा पूजासामग्री भेटिएको हो । पुलमाथि रातो कपडाले बेरिएको माटोको घैंटो जस्तो देखिने अवस्थामा रहेको शंकास्पद वस्तु बेवारिसे फेला परेको थियो ।
