नेपालगन्ज — दुई छोरा र पत्नीसँग बाँकेको बैजनाथ गाउँपालिका–१, चिसापानीमा बस्दै आएका ३६ वर्षीय मानबहादुर बुढा अहिले ह्वीलचियरको सहाराबिना बस्न सक्दैनन् ।

न त खुट्टाले उभिन सक्छन्, न दुई हातको भर नै छ । परिवारका सदस्यको सहायतामा उनी घर भित्र बाहिर गर्छन् । २०७८ फागुन २२ गते मोटरसाइकल दुर्घटनामा परी उनी घाइते भएका थिए । उक्त दुर्घटनामा उनका फुपुका छोराले ज्यान गुमाए । उनी बाँच्न सफल भए पनि कम्मरभन्दा मुनिको भाग चल्दैन । टाउकोसमेत आफैं थामिँदैन । 

५ वर्षीय छोरा र ११ वर्षीया छोरा वडा मार्फत नि:शुल्क पढिरहे पनि दैनिक खर्चको जोहो गर्न उनको परिवारलाई सकस छ । नियमित गर्नुपर्ने फिजियो थेरापी पनि रकम अभावका कारण गर्न सकेका छैनन् । 

त्यही ह्वीलचियरको सहारा लिँदै उनी अहिले टिकटकबाट आफ्नो उपचारका लागि खर्च जुटाउँदै आएका छन् । 

‘उपचारमा पसलदेखि भएका सबै सम्पत्ति बेचे, बस्नका लागि घर बाहेक केही छैन । वर्षभरी खेतीबाट बटैयाको १५ हजार  आउँछ । त्यो बाहेक जिबिका चलाउने स्रोत छैन,’ बुढाले भने, ‘दुई वर्षदेखि यही टिकटकबाट उपचार खर्च जुटाउँदै आएको छु । मनकारी हरुले सहयोग गर्दै आउनुभएको छ ।’