रुकुम पूर्व — निर्माणाधीन सहिदमार्ग अन्तर्गत पुथाउत्तरगंगा गाउँपालिकाको वडा नं. ११ र १२ सिमानास्थित फल्मैमा पहिरो झर्दा पटक–पटक बाटो अवरुद्ध हुने गरेको छ ।

मर्मत गरेर केही समय चल्ने गरेको भए पनि ठूलो पानी पर्ने बित्तिकै फेरि पहिरो झर्ने भएकाले पुथाउत्तरगंगा प्रवेश मै चुनौती भएको छ ।  

दाङको घोराहीबाट रोल्पा हुँदै रुकुम पूर्वको मैकोटसम्म जोड्ने कुल २ सय २० किलोमिटर लामो सहिदमार्गको निर्माण पूरा नहुँदा खासगरी रुकुम पूर्वका विभिन्न ठाउँमा वर्षायाममा आवतजातमा कठिनाई हुने गरेको छ ।

यो वर्ष पुथाउत्तरगंगा गाउँपालिका प्रवेश गर्ने स्थानमै पहिरो झरेकाले समस्या भैरहेको पालिका अध्यक्ष पुणिराज घर्तीले बताए । ‘हामीले पालिकाको डोजर नै त्यहिँ खडा गरेका छौं । पहिरो झर्छ फाल्यो अनि फेरी पानी पर्नेबित्तिकै समस्या दोहोरिन्छ,’ उनले भने, ‘यो बाटो खुलेपछि मात्रै पालिकाको केन्द्र तकसेरासम्म आवतजावत गर्न सकिन्छ । बाटो बन्द भए त मान्छे मात्रै होइन दैनिक उपभोग्य सामाग्रीको ढुवानीमा पनि चुनौती थपिन्छ ।’