अर्घाखाँची — संघीयतापछि गुल्मी, पाल्पा र अर्घाखाँची कार्यक्षेत्र बनाई सन्धिखर्कबाट काम गर्दै आएको संघीय खानेपानी तथा ढल व्यवस्थापन आयोजनाको कार्यालय बुटवलमा सर्ने भएको छ ।

संघ सरकारले यस्तै साविकका आयोजना इलाम, म्याग्दी र जुम्लालाई अन्य कार्यालयमा गाभ्दा अर्घाखाँचीमा रहेको आयोजनालाई पनि बुटवलमा गाभेको हो । 

सो आयोजना अर्घाखाँचीमै कायम राख्न माग गर्दै कांग्रेस, एमाले, माओवादी, रास्वपा, नेकपा एस, राजमोसहितका आठ दलले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाएका छन् । उनीहरूले खानेपानी योजना अलपत्र पर्ने भएकाले र संघीयताको मर्मविपरीत सारिएको संघीय खानेपानी तथा ढल व्यवस्थापन आयोजनाको कार्यालय सन्धिखर्कमै कायम राख्न माग गरेका हुन् । 

 आयोजनाले अर्घाखाँची, गुल्मी र पाल्पामा सुरुदेखि नै दुई सयजति खानेपानीका योजना सञ्चालन गरेको छ । कार्यालय नै सरेपछि अधिकांश योजना अलपत्र पर्ने चिन्तामा उपभोक्ता रहेका छन् । सो कार्यालयबाट सञ्चालित योजनाले तीन जिल्लाका ३४ हजारभन्दा बढी घरधुरीका १ लाख ६० हजार २ सय ६८ जनसंख्या लाभान्वित भएको कर्मचारी बताउँछन् । जलवायु अनुकूलित खानेपानी प्रदान गर्ने उद्देश्य अनुरूप सन्धिखर्कमा कार्यालय रहेर तीन जिल्लामा काम गरेको थियो । अर्घाखाँचीमा ४४, गुल्मीमा ४५ र पाल्पामा ३४ गरी १ सय २३ वटा योजनामा काम भइरहेको थियो ।