पाल्पा — पाल्पाका सात राजनीतिक दलले भ्रष्टाचार, कुशासन, अनियमितता, महँगी र दण्डहीनताको अन्त्यको माग गदै पाल्पाका प्रमुख जिल्ला अधिकारी तोयनारायण सुवेदीलाई ध्यानाकर्षण गराएका छन् । जिल्लामा क्रियाशील एवं सरकार बाहिर रहेका दलहरूले १० बुँदे विभिन्न समस्या औँल्याएका हुन् । 

जिल्लास्थित यातायात व्यवस्था सेवा कार्यालय, विशेष नापी कार्यालय, खानेपानी तथा सरसफाइ डिभिजन कार्यालय, मालपोत लगायत सरकारी कार्यालयमा घुसबिना काम नहुने गुनासो आम नागरिकको भएकाले तत्काल यस विषयलाई सम्बोधन गर्न ध्यानाकर्षण गराइएको छ ।

कृषि ज्ञान केन्द्रको योजना अनुगमनको विषयलाई लिएर समेत ध्यानाकर्षण गराएका छन् । सरकारी कार्यालयमा साथै सामाजिक तथा धार्मिक संघसंस्थामा राजनीतिक हस्तक्षेप र भागबन्डा बन्द गराउन पहल गर्न माग गरिएको छ । 

कच्ची सडकमा कायम भएको चर्को भाडा दर तत्काल समायोजन गर्न माग गर्दै जनताको आवागमनलाई सहज हुनेगरी समय तालिम निर्धारण गर्न माग गरेका छन् । चाडपर्वको समयमा हुने वस्तुको कृत्रिम अभाव, मूल्य वृद्धि, मिति गुज्रिएका सामानहरूको बिक्रीवितरणमा हुने सम्भावना रहने हुँदा समयमै बजार अनुगमन गरी बजार मूल्य नियन्त्रण गर्न माग गरेका छन् । गत आर्थिक वर्षसम्म निरन्तरता पाइरहेका जिल्लाका सयौँ क्रमागत आयोजनाहरूमा यस वर्ष शून्य बजेटका कारण अलपत्र परेकाले त्यस्ता आयोजना सम्पन्न गर्न सम्बन्धित निकायलाई ध्यानाकर्षण गराएका छन् ।