नियुक्तिका लागि प्रदेश प्रमुखसमक्ष पत्राचार, सोमबार शपथको तयारी
What you should know
बुटवल — लुम्बिनीका मुख्यमन्त्री चेतनारायण आचार्यले मन्त्रिपरिषद् बिस्तार गरेका छन् । उनले खाली रहेको युवा तथा खेलकुद मन्त्रीमा लोसपाका संसदीय दलका नेता सन्तोषकुमार पाण्डेलाई आइतबार नियुक्त गरेका हुन् । योसँगै लुम्बिनी प्रदेश सरकारमा उनी चौथो पटक मन्त्री बन्ने भएका छन् ।
पाण्डे यसअघि आन्तरिक मामिला तथा कानुनमन्त्री भएका थिए । पटक–पटक मन्त्री भएका पाण्डेले कांग्रेस–एमाले गठबन्धनको अहिलेको सरकारले ल्याएको बजेट पारित गर्न सहयोग गरेका थिए । बजेट पारित गर्ने समयमा प्रमुख प्रतिपक्ष दलसहित विपक्षी दलहरुले प्रदेश सभा बैठक बहिष्कार गरेपछि सत्ता पक्षमै रहेको लोसपा एकाएक विपक्षीमा पुगेको थियो । त्यतिबेलै कांग्रेस एमालेले पाण्डेलाई मन्त्री बनाउने सहमति गरेर सरकारलाई दिएको समर्थन फिर्ता गराएर विपक्षमा बस्न लगाएका थिए ।
तिनै पाण्डे अहिले युवा तथा खेलकुद मन्त्री बन्न लागेका हुन् । पाण्डेको सोमबार प्रदेश प्रमुख समक्ष शपथ ग्रहण गराउने तयारी छ । पाण्डे दुई पटक भौतिक पूर्वाधार र एक पटक आन्तरिक मामिला तथा कानुन मन्त्री बनेका थिए ।
लुम्बिनी प्रदेश सभामा लोसपाका ३ जना सदस्य छन् । लोसपाबाट सरकारमा मन्त्री थपिएसँगै लुम्बिनी प्रदेश सभामा मुख्यमन्त्रीसहित १२ मन्त्री पुगेका छन् । यसअघि कांग्रेसले ५ र एमालेले मुख्यमन्त्रीसहित ५ मन्त्रालय लिएका थिए । थप भएका दुई मन्त्रालयमध्ये जसपाले आन्तरिक मामिला तथा कानुनमन्त्री पाएको छ ।
लोसपालाई युवा तथा खेलकुद मन्त्रालय दिइएको हो । लुम्बिनीमा एमालेले मुख्यमन्त्री, भौतिक पूर्वाधार, ऊर्जा तथा सिँचाइ, भूमि व्यवस्था, कृषि तथा सहकारी र स्वास्थ्य मन्त्रालय लिएको छ । कांग्रेसले आर्थिक मामिला तथा योजना, सहरी विकास तथा खानेपानी, सामाजिक विकास, उद्योग पर्यटन तथा यातायात र वन तथा वातावरण मन्त्रालय लिएको छ ।
मुख्यमन्त्री कार्यालयले आफूलाई युवा तथा खेलकुद मन्त्रीमा नियुक्त गर्न प्रदेश प्रमुखको कार्यालयमा पत्राचार गरिसकेको जानकारी पाएको पाण्डेले बताए । ‘प्रदेश प्रमुख कहाँ पत्र पठाइसकेको जानकारी पाएको छु,’ उनले भने, ‘सोमबार ३ बजे शपथ ग्रहण गर्ने भन्ने निर्देशन भएको छ । मैले त्यही अनुसार तयारी गरिरहेको छु ।’ उनले आफू यसअघि तीन पटक मन्त्री बनेको र अहिले चौथो पटक मन्त्री बन्न लागेको पनि बताए ।
