अर्घाखाँची — बारीमा घोगा लाग्दै गरेको मकै बाँदर र बँदेलले सखाप पार्न थालेपछि हेरालु दस्ता परिचालन गरिएको छ ।वन्यजन्तुबाट बालीनालीमा बढी क्षति हुने क्षेत्र छनोट गरेर डिभिजन वन कार्यालयले २० जना हेरालु दस्ता भर्ती गरी तीन महिनाका लागि बारी र बस्तीमा खटाएको हो ।

दस्तामा १८ देखि ४५ वर्ष उमेरका २० जनालाई भर्ती गरिएको छ । ३६ जनाको आवेदन परेकामा छनोट भएका २० जनालाई प्रशिक्षण दिएर सोमबारदेखि गाउँ गाउँमा पठाइएको छ ।

‘वन्यजन्तुबारे कानुनी कुरासहित बाली जोगाउने उपायबारे सिकाएका छौँ,’ डिभिजन वन कार्यालय प्रमुख मोहनप्रसाद श्रेष्ठ भन्छन्, ‘अब दस्ताले मकै बारीमा बाँदर पस्न खोज्दा गाउँलेलाई सूचना दिने, बाँदरको संख्या गणना गर्ने र लखेट्नेलगायतका काम गर्नेछन् ।’ उनीहरूले बाँदरबाट मकै जोगाउने उपायबारे किसानलाई जानकारी पनि दिनेछन् । आफ्नो घरपायक ठाउँका व्यक्तिलाई दस्ताका रूपमा तीन महिनाका लागि नियुक्ति दिइएको कार्यालयले जनाएको छ ।

शीतगंगा नगरपालिकाबाहेक अर्घखाँचीका पाँच वटा स्थानीय तहलाई वन्यजन्तु प्रभावित क्षेत्र घोषणा गरिएको छ । मालारानी गाउँपालिका–४ लुटीपोखरा, वडा ३ को खनार क्षेत्र, भूमिकास्थान नगरपालिका–९ ढिकुरा, वडा १० को धमचौर, पाणिनि गाउँपालिका–८ को पाली, वडा ५ को मैदान, वडा ६ को धातीवाङ, वडा १ को पणेना, वडा ७ को अडगुरी प्रभावित क्षेत्र हुन् । त्यस्तै, सन्धिखर्क नगरपालिका–४ को वाङला, वडा २ को कुर, वडा ६, वडा १ पटुवाथुम र वडा ८ किमडाँडा पनि वन्यजन्तु प्रभावित क्षेत्रमा समेटिएको छ । छत्रदेव गाउँपालिका–२ र ३ बल्कोट क्षेत्र, वडा १ चिदिका केरुंगा, अर्घातोष क्षेत्र बाँदर प्रभावित क्षेत्र हुन् । यिनै क्षेत्रमा हेरालु दस्ताले काम गर्नेछन् ।