नेपालगन्ज — लुम्बिनी प्रदेश सरकारको ७ करोड ७७ लाख रुपैयाँ लागतमा लुम्बिनी प्रदेश प्रहरी अस्पताल बाँकेमा अपरेसन थिएटर भवन  निर्माण गरिएको छ । लुम्बिनी प्रदेशका मुख्यमन्त्री चेतनारायण आचार्यले बिहीबार नवनिर्मित अपरेसन थिएटर भवनको उद्घाटन गरेका हुन् ।

प्रदेश सरकारले प्रहरी अस्पतालको स्तर वृद्धिमा विशेष ध्यान दिने र यसलाई १५ शैयामा सीमित नराखी ५० शैयाको अस्पतालका रूपमा विकास गरिने उनले बताए ।

‘अविलम्ब आवश्यक पर्ने कागजात प्रदेशको स्वास्थ्य मन्त्रालयमा पठाउनुस् । आगामी दिनमा यो अस्पताललाई बाँकेको विशिष्टिकृत अस्पतालका रूपमा विकास गरिनेछ,’ मुख्यमन्त्री आचार्यले भने, ‘प्रदेश सरकारका तर्फबाट यसलाई विधिवत् रूपमा ५० शैयाको अस्पतालका रूपमा स्तरवृद्धि गरेर अगाडि बढाउने छौं । उपकरण र विशेषज्ञ जनशक्तिको व्यवस्थापन गर्न पनि प्रदेश सरकारले आवश्यक पहल गर्नेछ ।’