बर्दिया — मधुवन नगरपालिकाले सरकारी जग्गामा रहेको रुख धमाधम फँडानी गरेको छ । मधुवन–८ दुर्गापुर स्थित कपास विकास समितिको जग्गामा रहेका सागुन र सिसौ जातका हरिया रुख मनोमानी तरिकाले काटिएको हो ।

३ बिघा जग्गाको चारैतिर बाटो हुँदाहुँदै पनि नगरपालिकाले सरकारी जग्गा मिचेर बाटो निकाल्ने खोजेको कपास विकास समितिको आरोप छ । सल्लाह नगरी सरकारी जग्गामा रहेको रुख धमाधम ढालेको कपास विकास समितिका कार्यकारी निर्देशक वीरेन्द्रराज पराजुलीले बताए । ‘उक्त जग्गाको हामीसँग पुर्जा छ,’ उनले भने, ‘तर,पनि मधुवनले अतिक्रमण गरेको आरोप लगाउँदै खोइकुन प्रयोजनको लागि बाटो निकाल्न खोजेको छ ।’ 

‘हामीले जग्गामा लगाएको काँडेतार फालेर नगरपालिकाले रुख ढालेको छ । सुरुमै रोक्न खोजे पनि मानेनन्,' उनले भने, 'आवश्यक कारवाहीका लागि लिखित रुपमा जिल्ला प्रशासन र डिभिजन वन कार्यालयमा निवेदन दिइसकेको छु । नगरपालिकाले धमाधम २७ वटा सागुन र सिसौको हरिया ठूला रुख फडानी गरेको छ ।'