काठमाडौँ — विश्व सम्पदास्थल लुम्बिनीमा पर्यटकलाई सुविधा दिन ल्याइएका विद्युतीय बस र भ्यानले करिब ५ वर्षपछि हरियो नम्बर प्लेट पाएका छन् । 

नेपाल भित्रिएको करिब १६ महिनापछि सरकारी नम्बर (सेतो) प्लेट पाएका बस र भ्यानले पाँच वर्षपछि बल्ल पर्यटक चढ्ने हरियो नम्बर प्लेट पाएका हुन् । 

संघीय सरकार, प्रदेश सरकार र यातायात व्यवस्था कार्यालयबीच नीतिगत अस्पष्टता र अपर्याप्त कानुनका कारण बस र भ्यानले हरियो नम्बर प्लेट पाउन सकेका थिएनन् । लुम्बिनी बौद्ध विश्वविद्यालयका विद्यार्थीले अदालतमा रिट दायर गरेपछि हरियो नम्बर प्लेट जोड्न सम्भव भएको हो । 

बस र भ्यानलाई हरियो नम्बर प्लेट दिन माग गर्दैर् लुम्बिनी बौद्ध विश्वविद्यालय सिटी क्याम्पस बुटवलका बीए एलएलबी अध्ययनरत रोशन घिमिरे, सिमाना थापा क्षेत्री, नवीन खनाल, प्रविन तिवारी र कुलदीप तिवारीले परमादेशलगायत उपयुक्त आदेश माग गर्दै गत असोजमा उच्च अदालत तुलसीपुर बुटवल इजलासमा रिट दायर गरेका थिए । 

उच्च अदालत तुलसीपुरको बुटवल इजलासले लुम्बिनी विकास कोष मातहत रहेका विद्युतीय सवारीलाई हरियो नम्बर प्लेटमा परिवर्तन गरी सञ्चालन गर्न परमादेश जारी गरेको थियो । न्यायाधीशद्वय राजेश्वर तिवारी र पुण्यशिला दवाडी घिमिरेको संयुक्त इजलासले सवारीसाधनलाई हरियो नम्बर प्लेटमा रूपान्तरण गरी पर्यटन प्रयोजनका लागि सञ्चालन गर्न गत चैत ११ मा परमादेश जारी गरेको थियो । 

पर्यटन प्रयोजनका लागि हस्तान्तरित ५ बस र १४ भ्यानसहित १९ विद्युतीय गाडीलाई सेतो प्लेटबाट हरियोमा परिवर्तन गरी उद्देश्यअनुसार सञ्चालन गर्न उच्च अदालतले एक महिनाको समय सीमा तोकेको थियो । परमादेश जारी भएको तीन महिनापछि गत साता यातायात व्यवस्था कार्यालय बुटवलले हरियो प्लेटको नम्बर दिएको छ । अझै पनि ती सबै गाडीले हरियो प्लेट पाउन सकेका छैनन् । एउटा बस र दुई वटा भ्यानले हरियो प्लेट पाएका छैनन् । दुई भ्यान दुर्घटनामा परेर बुटवलमा मर्मत भइरहेको छ । एउटा बसको भने अगाडिको सिसा फुटेको छ ।