बुटवल — बुटवल उपमहानगरपालिकाले आगामी आर्थिक वर्ष २०८२/२०८३ का लागि ३ अर्ब ३६ करोड १३ लाख रुपैयाँको बजेट सार्वजनिक गरेको छ। सोमबार बसेको नगरसभाको सत्रौं अधिवेशनको तेस्रो बैठकमा उपप्रमुख सावित्रादेवी अर्यालले बजेट प्रस्तुत गर्दै चालु तर्फ ४९ प्रतिशत र पुँजीगत तर्फ ५१ प्रतिशत बजेट रहने अनुमान प्रस्तुत गरेकी छन्।

सोमबार नगरसभाको सत्रौं अधिवेशनको तेस्रो बैठकमा उपप्रमुख अर्यालले बजेट प्रस्तुत गर्दै चालुतर्फ ४९ प्रतिशत र पूँजीगततर्फ ५१ प्रतिशत रहने अनुमान सुनाइन् ।

उपमहानगरले आन्तरिक स्रोततर्फ आगामी वर्षका लागि ९५ करोड आय हुने अनुमान गरेको छ । उपमहानगरपालिकाले शिक्षा, स्वास्थ्य, रोजगार, पर्यटन र कृषिलाई विशेष प्राथमिकता दिएर बजेट ल्याएको छ। कलेजमा अध्ययनरत विद्यार्थीहरूलाई सहभागी गराइ ‘पढाइसँगै रोजगार सिर्जना गरौं, युवालाई देशमै बस्ने परिस्थिति निर्माण गरौं’ भन्ने उद्देश्यका साथ ट्राफिक व्यवस्थापनमा स्नातक र स्नातकोत्तर तहमा अध्ययनरत विद्यार्थीहरूलाई खटाउने कार्यक्रमलाई बुटवलले प्राथमिकता दिएको छ । जसका लागि ५० लाख रूपैयाँ विनियोजन गरिएको उपप्रमुख अर्यालले बताइन ।

यस्तै, ‘बुटवलको सपना, निजी क्षेत्रसँगको सहकार्यमा बुटवलको समृद्धिको परिकल्पना’ भन्ने मर्मसहित निजी क्षेत्रसँग सहकार्य गरी कार्यक्रम सञ्चालनका लागि १ करोड विनियोजन गरिएको छ । बुटवललाई पर्यटकीय विश्रामस्थलका रूपमा स्थापित गर्नका लागि पर्यटन प्रवर्द्धनका कार्यक्रम सञ्चालन गर्न ५० लाख र बुटवललाई सांस्कृतिक शहर बनाउनका लागि १ करोड १५ लाख रूपैयाँ बजेट छ ।