बर्दिया — चोरीसम्बन्धी कसुरमा फरार रहेका दुई जनालाई प्रहरीले पक्राउ गरेको छ । लुकिछिपी बसेको अवस्थामा दुई जनालाई प्रहरीले मंगलबार पक्राउ गरेको हो । पक्राउ पर्नेमा गुलरिया नगरपालिका–६ का २७ वर्षीय केशबहादुर शाही र मधुवन नगरपालिका–८ गाउँ नम्बर ५ का २२ वर्षीय भूपेन्द्र क्षेत्री रहेका छन् । 

जिल्ला अदालतले शाहीलाई २०८१ मंसिर ५ गते चोरीसम्बन्धी मुद्दामा २० दिन कैद, ३ हजार रुपैयाँ जरिवाना र २ सय रुपैयाँ राहत कोषमा जम्मा हुने गरी सजाय फैसला गरेको थियो भने २०८१ वैशाख १६ गते चोरी मुद्दामा अदालतले क्षेत्रीलाई १० दिन कैद, २ हजार जरिवाना र २ सय रुपैयाँ राहत कोषमा जम्मा हुने गरी सजाय फैसला गरेको थियो ।