बर्दिया — धानको बिउ छर्ने बेला बर्दियामा रासायनिक मलको अभाव भएको छ । मलको अभाव हुन थालेपछि किसान भारतीय सीमावर्ती बजार पुग्न थालेका छन् । हरेक दिन बिहानै सीमावर्ती बजार चित्लहवा लगायतका नाकाबाट उनीहरूले मल भित्र्याउने गरेका छन् ।

किसानको समस्यालाई हेरेर प्रशासनले एकजनालाई एक बोरा मल ल्याउन दिएको छ । भारतबाट मल ल्याउँदा सास्ती खेप्नुपरेको किसानको गुनासो छ । गुलरिया–८ का रामस्वरुप थारुले सहकारी संस्थाले एक बोरा मल दिए पनि कनिका छरे जस्तो भएकाले अर्पाप्त भएको बताए । 'चुनावका समय मलको अभाव हुन नदिने वाचा गर्छन्,’ उनले भने, ‘चुनाव जितेपछि फर्केर हेर्दैनन् ।'

गुलरिया–५ का दुबार थारुको अवस्था उस्तै छ । सरकारले समयमा मलको पर्याप्त व्यवस्था नगर्दा धान उत्पादनमा ह्रास आउने उनले बताए ।