कपिलवस्तु निर्वाचन क्षेत्र नम्बर १ (१) बाट विजयी पन्थी एमाले प्रदेशसभा सदस्य एवं एमाले लेखा आयोगका सदस्य हुन् । निर्वाचन क्षेत्र कपिलवस्तु भए पनि उनको बसोबास बुटवलमा छ । उनले पक्राउ पुर्जी जारी भएको विषयमा अनभिज्ञता प्रकट गरे । ‘आजसम्म अदालतले मुद्दा परेको विषयमा कुनै जानकारी गराएको छैन, यो विषयमा अनभिज्ञ छु,’ उनले भने, ‘एक्कासि सञ्चारकर्मीहरूले फोन गरेर सोधेपछि मात्रै जानकारी पाए र अहिले कानुन व्यवसायीसँग परामर्शमै छु ।’

साझेदारीमा खोलिएको हाइड्रोपावर घाटामा गएकाले ८ वर्षअघि नै बिक्री गरिएको उनले बताए । ‘मलाई अहिलेसम्म पनि कम्पनीमा कुनै ऋणी रहेको र उनले रकम भुक्तानी नपाएर मुद्दा हालेको जानकारी नै छैन,’ उनले भने ।

लुम्बिनी प्रदेशका प्रहरी प्रमुख डीआईजी राजेन्द्रप्रसाद भट्टले सञ्चारमाध्यमबाट जानकारी पाए पनि यस विषयमा आफू अध्ययनमै रहेको बताए । ‘म सरुवा भएर आएको केही दिन मात्र भएको छ,’ उनले भने, ‘मेरा लागि यो नयाँ विषय हो । सञ्चारमाध्यमबाट जानकारी पाएकाले सम्बन्धित जिल्ला रूपन्देहीलाई सूचनाको विषयमा जानकारी गराएर कानुनअनुसार अघि बढ्न निर्देशन दिइसकेको छु ।’

रूपन्देहीका प्रहरी प्रमुख एसपी प्रदीपबहादुर क्षेत्रीले आफूले रूपन्देहीको जिम्मेवारी सम्हालेको ६ दिन मात्र भएको र सञ्चारमाध्यमबाट जानकारी पाएपछि खोजी गर्दा कार्यालयमा कुनै रेकर्ड फेला नपरेको बताए । ‘पत्रपत्रिकाबाट जानकारी पाएपछि मैले खोजबिन गरें, तर कार्यालयमा कुनै रेकर्ड भेटिएन,’ उनले भने, ‘पत्रमा सांसद भनेर लेखेको पनि छैन, ठेगाना पनि खुलेको छैन । त्यसैले भेरिफाईको प्रयासमै छौं । सबै तथ्य खुलेको अवस्थामा प्रहरी कानुनअनुसार अघि बढ्छ ।’