अर्घाखाँची — पूर्वपश्चिम राजमार्ग अन्तर्गत कपिलवस्तुको गोरुसिंगेबाट करिब ५८ किमीमा अवस्थित अर्घाखाँचीको नरपानी गर्मी छल्ने गन्तव्य बन्दै गएको छ । 

धार्मिक पर्यटकीय गन्तव्य सुपा देउराली मन्दिर नजिकै रहेको नरपानीमा शीतल खोज्दै तराई र भारतबाट दैनिक सयौंको संख्यामा पर्यटक भित्रिन्छन् । जहाँ नर्तनाञ्चल पर्वतमा चिसो हावापानी रहेको छ ।

बिहीबार चार जनाको परिवारसहित भारतको सिद्धानगरबाट पुरन महतो नरपानी आइपुगे । सुपा देउराली मन्दिरको दर्शनपछि नरपानी पिकनिक स्पोर्टमा प्रसाद ग्रहण गरे । दिनभर नाच्ने, गाउने, नर्तनाञ्चल पर्वतको जंगलमा विभिन्न तरिकाले फोटो र भिडियो खिचेर रमाए । 

नरपानीमै बास बसेर शुक्रबार उनी फर्किए । नरपानी क्षेत्रका विभिन्न ठाउँमा पैदल हिँडे । सुपा देउराली मन्दिरदेखि नरपानी क्षेत्रका पहाडको अवलोकन गर्दै तस्बिर र भिडियो पनि खिचे ।

‘आहा ! क्या सुन्दर पहाड रहेछ पहाड, साथीहरुलाई घुम्न जानुपर्ने ठाउँ रहेछ भन्छु र समय मिलाएर फेरि आउनेछु’ भन्दै उनी फर्किए । भारतमा गर्मीको बेला नरपानी चिसो ठाउँको खानाको स्वाद मिठो र डाँडोबाट चिसो हावामा रमाउँदा रमाइलो लागेको उनको प्रतिक्रिया छ । 

नेपाल–भारत सीमा कृष्णनगरबाट नरपानी नजिकै भएकाले पनि भारतीय नागरिक सुपा देउराली मन्दिर दर्शन गर्न र नरपानीमा गर्मी छल्न आउने पर्यटकको संख्या हरेक वर्ष बढेदो छ । नरपानी र सुपा देउराली क्षेत्रका होटल तथा रिसोर्ट गर्मीको बेला भारतीय पर्यटकले भरिन्छन् । 

रिसोर्टमा स्थानीय गहुँको सुख्खा रोटी, लोकल कुखुराको झोल, अचारसहित खसीको मासु मिश्रित नेपाली खाना मन पराउँछन् । डाँडाबाट हिमश्रृंखला हेर्दै पर्यटक रमाउने र लोकल खानाका परिकारमा बढी रुचि राख्ने गरेको नरपानी रिसोर्ट सञ्चालक पदम केसीको भनाइ छ । भारतीय पर्यटक नरपानीमै बास बस्ने गरी परिवार, साथीभाई मिलेरै गाडी रिजर्ब गरेर आउने गर्छन् । उनीहरु एक/दुई दिन यतै बस्छन् । 

नरपानी क्षेत्र भारतीय पर्यटकका लागि राम्रो गन्तव्यको रुपमा विकास हुँदै गएको उनले बताए । यसरी नरपानीमा आउनेको संख्या हरेक वर्ष बढ्दो रहेको छ । भारतबाट आएका बास बस्ने पर्यटकले नेपाली स्वादका खानाका परिकार मन पराउँछन् । यही पर्यटकलाई मध्यनजर गर्दै नरपानीदेखि करिब दुई किमी पोखेडाँडामा ४० वटा भन्दा बढी होमस्टे निर्माण भएका छन् । 

‘नरपानी क्षेत्रमा होटल बन्ने, खुल्नेक्रम पनि बढ्दो छ,’ सन्धिखर्क नगरपालिका–६ का वडाध्यक्ष श्रीधर महत्रा क्षेत्रीले भने, ‘अझै गाउँले पारिवारिक परिवेशमा बस्न, रमाउन खोज्ने पर्यटकको लागि होमस्टे खोलिएको छ । जहाँ होटल र रिसोर्टमा भन्दा धेरै सस्तो छ, लोकल खानाका परिकार खान पाइन्छ ।’ होमस्टेमा पनि भारतीय र तराई क्षेत्रका पर्यटकले फोन गरेरै रिर्जब गर्छन् । 

नरपानी र सुपादेउराली क्षेत्रमा आएका पर्यटकलाई सहज बसाइको व्यवस्थापन गर्दै स्थानीयलाई पर्यटनबाटै स्वरोजगारी गराउन पूर्वाधारका काम भैरहेको उनले बताए । नरपानीको पर्यटन प्रवर्द्धनबाटै स्थानीयको अवस्था बदल्ने गरी योजनाबद्ध रुपमा काम सञ्चालन गरिएको महत्राको भनाइ छ । 

लोकल कुखुरो, बोका र खसीको मासु, साग तरकारी, दूध लगायत खानाका परिकारले पर्यटकलाई थप लोभ्याएको छ । अर्को मोहित बनाउने दृश्य हो, यहाँबाट देखि हिमाल, हरियाली नर्तनाञ्चल पर्वत, खाँची लेक, सदरमुकाम सन्धिखर्कसहित पहाडी भेगका गाउँबस्ती हुन् । हिउँदको बेला तराई र भारतमा गर्मीको कारण सित्तल खोज्दै नरपानी पर्यटकको रोजाई हुने गरेको सन्धिखर्क नगरपालिका प्रमुख कृष्णप्रसाद श्रेष्ठले बताए ।

नगरपालिकाले गंगा सरोबर बनाएको छ । नरपानीको डाँडोमा हिन्दूधर्म अभियान्ता नारायण खनालको अगुवाइमा एकसय भन्दा बढी रैथाने गाई पालिएको छ । केही पर्यटक त्यहाँ पनि पुग्छन् । गाईको दूध, मोही, गहुँत खान पाइन्छ । ‘पर्यटकलाई डाँडा देखाउँदै घुमाएरै पर्यटन विकास भइरहेको छ,’ नरपानीका स्थानीय प्रितम केसीले भने, ‘धार्मिक गन्तव्य सुपा देउराली मन्दिर, चिसो नरपानी क्षेत्रमा पर्यटकलाई भुलाउन राज्यले पर्यटकीय पूर्वाधार निर्माण गर्नुपर्छ ।’