बुटवल — तिलोत्तमा नगरपालिकाको प्रमुख पर्यटकीय गन्तव्यको रुपमा रहेको शंकरनगर वनविहार तथा अनुसन्धान केन्द्र (वनवाटिका)को आगामी ४ वर्षे नेतृत्वमा कांग्रेस एमालेको गठबन्धनलाई हराउँदै अध्यक्षमा स्वतन्त्र उम्मेदवार विजयी भएका छन् ।

७ सय ७५ मतदाता रहेको वनवाटिकाको शुक्रबार भएको निर्वाचनमा ६ सय ६१ मत खसेको थियो । खसेको मतमध्ये ३ सय ६९ मत ल्याएर स्वतन्त्र उम्मेदवार खिमलाल पाण्डे विजयी भएका हुन् । नेकपा माओवादीको नेत्रविक्रम चन्दनिकट रहेका उनी स्वतन्त्रबाट निर्वाचनमा प्रतिस्पर्धामा थिए । उनका प्रतिद्वन्द्वी कांग्रेस एमाले गठबन्धनबाट इन्जिनियर किरण खरेलले २ सय ३४ मत ल्याएका थिए । खरेल एमाले निकट हुन् । 

त्यस्तै, उपाध्यक्षमा गठबन्धनबाट कांग्रेसका मिनप्रसाद देवकोटा ३ सय ७८ मत ल्याएर निर्वाचित भएका छन् । उनका प्रतिस्पर्धी स्वतन्त्रका लेखबहादुर खड्काले १३२ र चन्दा थापाले १०९ मत ल्याए । सचिवमा स्वतन्त्रका विदुर केसीले ३ सय ७९ मत ल्याएर विजयी भए । सचिवका प्रतिस्पर्धी हरिकला अधिकारीले १ सय ८८ र हिरामती थापाले ५७ मत ल्याइन् । त्यस्तै, कोषाध्यक्षमा गठबन्धनकै मनिराम भट्टराईले ३ सय ८५ मत ल्याएर निर्वाचित भएका छन् । स्वतन्त्रका सौरभ भुसालले १ सय ७५ र उदयसिंह थापाले ६३ मत ल्याएका थिए ।