नेपालगन्ज — बाँकेको डुडुवा गाउँपालिका–६ आसमानपुरमा रहेको पश्चिमकै ठूलो जयेन्दु बाल सुधारगृहमा फेरि झडप भएको छ ।सुधारगृहमा रहेका दुई समूहबीच झडप हुँदा पाँच जना घाइते भएका हुन् ।
‘१८ वर्षमाथिका र १८ वर्षमुनिका दुवैलाई सँगै राख्दा झडपको अवस्था आइरहने गरेको छ, ’ बाल सुधारगृहकी इन्चार्ज विमला काउचाले भनिन्, 'प्रहरी भित्र जान सक्दैन । उल्टै प्रहरीलाई कुट्छन ।’
शुक्रबार राति ११ बजेतिर झडप भएको खबर आएको थियो । त्यसपछि ठूलो संख्यामा प्रहरी घटनास्थलमा पुगेर प्रहरीले राति डेढ बजेतिर घाइतेको उद्धार गरेको थियो ।
अहिलेसम्म कति भागे भन्ने एकिन हुन सकेको छैन । यसअघि झडप गरिरहनेहरूलाई प्रहरीले नौबस्ता सुधार गृहमा स्थानान्तरण गरेको थियो ।
उक्त बाल सुधारगृहमा २६५ जनालाई राखिएको छ ।
