पाल्पा — मगर समुदायको संस्कृति प्रदर्शनी र रैथाने परिकारको स्वाद चखाउन पाल्पाको रम्भा गाउँपालिका–२, फोक्सिङ्कोट रानीवास गाउँमा सामुदायिक घरबास (होमस्टे) कार्यक्रम सुरु भएको छ ।

गाउँपालिका अध्यक्ष विष्णुप्रसाद भण्डारीले नजिकका पर्यटकीय स्थलको अवलोकन गराउने गरी सामुदायिक घरवास सुरु गरिएको बताए ।

पाल्पा क्षेत्र नम्बर १ बाट निर्वाचित प्रतिनिधिसभा सदस्य नारायणप्रसाद आचार्य र लुम्बिनी प्रदेशका स्वास्थ्यमन्त्री खेमबहादुर सारूले सामुदायिक होमस्टेको शुभारम्भ गरे । रानीवास गाउँमा ९० घर मगर समुदायको बसोवास छ । घरबास कार्यक्रममा १८ घरपरिवार सहभागी छन् । १४ घरमा खानेबस्ने गरी व्यवस्थापन मिलाइएको छ । होमस्टेमा एक हजार रुपैयाँमा खानबस्न सकिन्छ । 

रानीवास सामुदायिक घरबास कार्यक्रम फोक्सिङ्कोटकी अध्यक्ष देउकुमारी सारुले मगर संस्कृतिले धनी गाउँमा पुराना कला, संस्कृति र मगर समुदायको भेषभुषा, रहनसहनलाई व्यवस्थित गरेर प्रदर्शन गर्ने बताइन् । स्थानीय खानाका परिवार खुवाएर पर्यटकलाई आकर्षण बढाउने योजना रहेको उनको भनाइ छ । उनले होमस्टेमा कोदोको ढिँडो, रोटी, मकैको आँटो, गुन्द्रुक, स्थानीय जातका कुखुराको मासु, स्थानीय प्रजातिको सुँगुरको मासु, बटुक, सेलरोटी लगायतका परिकारको स्वाद लिन पाइने बताइन् । होमस्टेमा बस्ने पाहुनाले पन्चेबाजा, सालैजो, मारूनी, ठूलो नाच, झाम्रे लगायत सांस्कृतिक गतिविधि पनि देख्न पाउनेछन् ।