बाँके — बाँकेको राप्ती सोनारी गाउँपालिका-१ कुसुम गोठेरीस्थित बाँके राष्ट्रिय निकुञ्जभित्र पाटेबाघ मृत अवस्थामा फेला परेको छ । निकुञ्जमा खटिएको गस्ती टोलीले शुक्रबार उक्त क्षेत्रमा पाटेबाघलाई मृत अवस्थामा फेला पारेको हो ।

निकुञ्जभित्र नियमित गस्ती गर्ने क्रममा उक्त बाघ मरेको अवस्थामा भेटिएका थियो । निकुञ्जका प्रमुख संरक्षण अधिकृत वीरेन्द्र कँडेलले पाटेबाघको मृत्यु प्राकृतिक रूपमा भएको जस्तो देखिएको बताए ।

मृतक भाले पाटेबाघको उमेर १२ देखि १३ वर्षको हुन सक्ने अनुमान गरिएको छ । निकुञ्जको मध्यवर्ती क्षेत्र व्यवस्थापन समितिका अध्यक्ष गेहेन्द्रकुमार खड्का अनुसार गोठेरीस्थित घाँसे मैदानको छेउमा उक्त बाघ भेटिएको हो ।

मृतक बाघको शुक्रबार नै पोस्टमार्टम गरिएको अध्यक्ष खड्काले बताए । ‘बाघको शरीर हेर्दा करिब ३ तीन दिनअघि मरेको जस्तो देखिन्छ, शरीर हेर्दा बाघ आपसमा लडेर घाइते भई मरेको जस्तो देखिन्छ,’ उनले भने ‘सबै कुरा पोस्टमार्टम रिपोर्टपछि मात्र  खुल्छ  ।’