कार्यक्रमको उद्घाटन गर्दै लुम्बिनी प्रदेशका पूर्व वन तथा वातावरण मन्त्री अर्जुन केसीले प्रकृतिको संरक्षण नगरे देश जति धनी भए पनि अर्थ नहुने बताए । 

‘वनमा रुखमात्रै नभएर वातावरण, वन्यजन्तु, जडीबुटी, जीवजन्तु, पानी सबै हुन्छ,’ उनले भने, ‘अहिले सबै मासिएर जंगलमा राता बाँदर मात्रै देखिएका छन् ।’ वनमा लगाइने डढेलोका कारण जीवजन्तु, जडीबुटी सबै हराउँदै जानु अत्यन्तै चिन्ताको विषय भएको पनि उनले बताए । 

राष्ट्रिय वनलाई सामुदायिकमा जिम्मा लगाएपछि ४४ प्रतिशत पुगेको उनको दाबी थियो । नेपालको वन राजस्व र रोजगारीको प्रमुख केन्द्र बन्नुपर्ने पनि उनको भनाइ छ ।

लुम्बिनीका १२ जिल्लामा मात्रै राम्रोसँग व्यवस्थित रूपमा वनबाट राजस्व उठाउने हो भने २ अर्ब रुपैयाँ प्रदेश सरकारलाई उठ्ने उनको दाबी छ । 

कार्यक्रममा डिजिभन वन कार्यालय चन्द्रौटाका डिभिजन प्रमुख राजु क्षेत्री, सवडिभिजन कार्यालय खगेन्द्रपुरका वरिष्ठ वन अधिकृत पहलमान सेर्बुजामगरलगायत साझेदारी वनका प्रतिनिधि र उपभोक्ताको उपस्थिति रहेको थियो ।

अर्घाखाँचीसँग सीमा जोडिएका ७ सय ४० हेक्टर क्षेत्रफलमा फैलिएको सो वनमा साल, साज, करम र बैजाली लगायतका रुख रहेका छन् । पुराना र ढलेका रुख निकालेर काठ तथा दाउराको रूपमा बिक्री गर्ने र नयाँ विरुवा रोप्ने काम गर्दै आएको छ । काठदाउरा बिक्रीबाट गाउँमा विकास निर्माण सहित सामाजिक कार्य गरिँदै आएको वन समूहले जनाएको छ ।