पाल्पा — तानसेन र रामपुर नगरपालिकाले आ-आफ्नो नगरसभाबाट विभिन्न ऐन संशोधन तथा प्रतिवेदन पारित गरेका छन् । तानसेन नगरपालिकाको हिउँदे अधिवेशनले विनियोजन ऐन, २०८१ (संशोधन विधेयक) र न्यायिक समितिको प्रतिवेदन पारित गरेको हो ।

तानसेन नगर उपप्रमुख प्रतिक्षा सिंजालीले सभामा प्रस्तुत गरेका संशोधन विधेयक र न्यायिक समितिको प्रतिवेदन पारित भएको छ ।

संशोधन विधेयकमा आर्थिक वर्ष २०८१/०८२ को लागि नगर कार्यपालिका, वडा कार्यालय, विषयगत शाखाले गर्ने सेवा र कार्यका निम्ति अनुसूची–१ मा उल्लेखित खर्च गर्न सकिने उल्लेख छ । जसमा चालु खर्च, पुँजीगत खर्च र वित्तिय व्यवस्थापनको रकम समेत गरी एक अर्ब ५३ करोड ६० लाख ७८ हजार ६ सय २४ रुपैयाँमा नबढाई सञ्चित कोषबाट खर्च गर्न सकिने निर्णय भएको सभाका अध्यक्ष एवं नगर प्रमुख सन्तोषलाल श्रेष्ठले बताए ।

न्यायिक समितिका संयोजक सिंजालीले ६ महिनाको अवधिमा न्यायिक समितिले गरेका काम, कर्तव्य र गतिविधि जानकारी गराइन् । सभा सदस्य माधव बस्यालले संशोधन विधेयक र न्यायिक समितिको प्रतिवेदन माथि सुझाव दिए । सभा सदस्य धन कुमारी विष्टले तानसेन–१० मा गणेशको मूर्ति बेवारिसे अवस्थामा राखिएको र मुर्ति व्यवस्थापन गर्नुपर्नेमा जोड दिइन् ।

त्यस्तै, रामपुर नगरपालिकाको नगर सभाले विभिन्न योजनाको बजेट रकमान्तर तथा शीर्षकान्तर सहित स्थानीय युवा परिषद् ऐन संशोधन गरेको छ । हिउँदे सभाले वडा तथा नगर स्तरीय ४० वटा योजना तथा कार्यक्रमको बजेट ८६ वटा योजनामा रकमान्तर तथा शिर्षकान्तर गरेको रामपुर नगरपालिकाका उपप्रमुख बाल कुमारी थापाले बताइन् ।

वडा स्तरीय र नगर स्तरी ४० वटा योजनाको दुई करोड एक लाख ६५ हजार बजेट ८६ वटा योजना तथा कार्यक्रममा शीर्षकान्तर गरिएको उनले बताइन् । सभामा नगर सभाका सदस्य तथा विद्येयक समितिका संयोजक मीनबहादुर सिंजालीले प्रस्तुत गरेको  स्थानीय युवा परिषद् ऐन संशोधन प्रस्ताव पारित गरेको छ । जनताको चाहाना अनुसार स्रोत साधनले भ्याए सम्म विकास र सेवालाई प्राथमिकता दिदै आएको नगर प्रमुख रमण बहादुर थापाले बताए ।

सबै शीर्षकान्तर भएका योजनाको प्रभावकारी कार्यान्वयन गर्न आवश्यक रहेको उनले बताए । रामपुर नगरपालिका–३ का वडा अध्यक्ष दामोदर पाठकले जनतालाई सहज र सरल रुपमा सेवा प्रवाह गर्नुपर्नेमा जोड दिए । रामपुर–१०, का वडाध्यक्ष तोयानाथ सारु थापाले विनियोजित बजेट कार्यान्वयनमा विभिन्न बाधा र अड्चन आउँदा समस्या भएको बताए ।