रुकुम पूर्व — सिस्ने गाउँपालिका–२ नायगाढमा रहेको प्वाङ स्वास्थ्य चौकीको प्रयोगशाला (ल्याब) अवरुद्ध भएको छ । परीक्षणका लागि आवश्यक सामग्री भएर पनि दक्ष जनशक्ति नहुँदा सेवा सुचारु हुन नसकेको हो ।

स्वास्थ्य चौकीमा प्रयोगशालाका लागि आवश्यक पर्ने आधारभूत सामग्री भए पनि दक्ष जनशक्ति नहुँदा गत असोजदेखि सेवा अवरुद्ध भएको स्वास्थ्य चौकी प्रमुख काशीराम खड्काले बताए । 

‘गत २०७९ पुसमा प्रयोगशाला स्थापना गरिएको थियो । करार ल्याब असिस्टेन्टले असोजमा जागिर छोडेपछि सेवा रोकिएको छ,’ उनले भने, ‘यसले गर्दा हामीले यहाँबाट प्रदान गर्ने सेवा पनि प्रभावकारी हुन सकिरहेको छैन ।’

यस प्रयोगशालाबाट गर्भवतीको ल्याव परीक्षण, क्षयरोग जाँच, यौन रोगको परीक्षण, टाइफाइड, दिशापिसाब परीक्षण, एस्पाइलरी परीक्षण, सुगर आदिको परीक्षण गर्ने गरिएको थियो ।