पाल्पा — पाल्पाको रम्भा गाउँपालिकाले शनिबारदेखि सुरु गरेको पाँचदिने एकीकृत घुम्ती शिविरमा एकै दिन १ हजार १८ जना नागरिकले सेवा लिएका छन् ।

शिविरको लुम्बिनी प्रदेशका स्वास्थ्य मन्त्री खेमबहादुर सारुले उद्घाटन गर्दै एकीकृत शिविरले नागरिकको घरदैलोमै सेवा प्रदान गरेको बताए । 

रम्भा गाउँपालिका–५, ताँहुमा आयोजित शिविरमा सेवाग्राहीको भीड लागेको थियो । रम्भा गाउँपालिकाले आर्थिक वर्ष २०८१/८२ को वार्षिक नीति तथा कार्यक्रम अनुसार राखेको शिविरमा सबै रोगको जाँच तथा उपचार निदानका लागि स्वास्थ्य प्रयोगशाला सेवा प्रदान गरिएको गाउँपालिका अध्यक्ष विष्णुप्रसाद भण्डारीले बताए । 

शिविरमा भिडियो एक्सरे, प्रजनन स्वास्थ्य सेवा, स्त्रीरोग शिविर तथा परामर्श सेवा लिन नागरिकको घुइँचो लागेको थियो । आँखा उपचार, निःशुल्क औषधि वितरणका साथै आयुर्वेद सेवा प्रदान गरिएको छ । शिक्षा, कृषि, पशुपन्छीका रोगका लागि परामर्श एवं आवश्यक औषधि वितरण गरिएको प्रमुख प्रशासकीय अधिकृत वीरबहादुर पुनले बताए । 

अपांगता भएका, ज्येष्ठ नागरिक, गरिबी परिचयपत्र वितरणका साथै प्रदेश, गाउँपालिका र वडाको योजना सम्झौताका लागि सेवा लिन उल्लेख्य संख्यामा सेवाग्राही आएका थिए । घरदैलोमै डाक्टरसहितको स्वास्थ्य जाँचले सेवाग्राहीको भीड लागेको थियो । भिडियो एक्सरे सेवा, ल्याब, प्रजनन स्वास्थ्य सेवा, स्त्री रोग विशेषज्ञ सेवा, एचपीए र डीएनए विधिबाट स्वाब संकलन, व्यवसाय दर्ता, ज्येष्ठ नागरिक र गरिव परिचयपत्र वितरण लगायतका सेवा प्रदान गरेको रम्भा गाउँपालिका स्वास्थ्य शाखा प्रमुख शिव अर्यालले बताए ।

शिक्षा शाखाअन्तर्गत गरिब तथा असहाय विद्यार्थीका लागि छात्रवृत्ति वितरण लगायतका सेवा प्रदान गरिएको छ । शिविरमा बेरोजगार सूची दर्ता, सामाजिक सुरक्षा भत्ताका लागि नयाँ दर्ता, कृषि प्रविधिसम्बन्धी सल्लाह, परामर्श, आवश्यक बीउबिजन वितरण लगायतका २७ प्रकारका सेवा दिइएको गाउँपालिकाका सूचना प्रविधि अधिकृत सुरज पाठकले बताए ।