गुल्मी — कालिगण्डकी गाउँपालिका अध्यक्ष वेदबहादुर थापाले राहदानी शाखाको स्क्यानर फुटाइदिएपछि जिल्ला प्रशासन कार्यालयमा राहदानी वितरण कार्य ठप्प भएको छ । 

टोकन प्रणालीका कारण आफ्नो पालिकाबाट आउने सेवाग्राहीको पासपोर्ट बनाउने पालो नआएको भन्दै थापाले प्रशासनको स्क्यानर फुटाइदिएपछि राहदानी सेवा ठप्प भएको हो । बिहीबार विपद् व्यवस्थापनसम्बन्धी बैठकका लागि प्रशासन कार्यालयमा पुगेका थापाले आफ्नो पालिकाबाट पासपोर्ट बनाउन आएका सेवाग्राहीको बारेमा बुझ्न राहदानी शाखामा पुगेको र विवाद भएपछि स्क्यानर फुटाएको सहायक प्रमुख जिल्ला अधिकारी हरिप्रसाद गैरेले बताए । ‘आज सेवाग्राही चाप धेरै भएकोले भोलिसम्मकै लागि टोकन वितरण भएको थियो, उहाँ अध्यक्षज्यूले केही सेवाग्राहीको पालो समयमै नआएको विषयमा विवाद हुँदा स्क्यानर फुटाउनुभएछ,’ गैरेले भने । 

स्क्यानर फुटाएपछि अध्यक्ष थापालाई प्रहरीले नियन्त्रणमा लिएको थियो । प्रहरीसमक्ष थापाले लिखित माफी मागेको र फुटाएको मेसिनको क्षतिपूर्ति तिर्ने सहमति भएपछि राति आफन्तको जिम्मा लगाएको जिल्ला प्रहरी कार्यालयका सूचना अधिकारी डीएसपी शंकर पोखरेलले बताए । 

कालिगण्डकी गाउँपालिका जिल्लाको सबैभन्दा टाढाको पालिका भएको कारण नागरिकता, पासपोर्ट र मालपोतको लागि मात्र सेवाग्राहीहरु सदरमुकाम आउने गर्दछन् । गाडी रिजर्भ गरेर सेवाग्राहीहरु आउने गरेकोले समयमै काम सम्पन्न हुन नसकेमा ठूलो धनराशी खर्च हुने गरेको कारण एकैदिनमा सेवा लिनुपर्ने बाध्यता छ । बिहीबार पनि बेलुकासम्म कुरेर बसेका सेवाग्राहीलाई आजै पासपोर्ट बनाइदिनु भन्ने विषयमा विवाद भएको पालिका अध्यक्ष थापाले प्रहरीसमक्ष स्वीकारेका छन् । 

गुल्मीमा राहदानी बनाउनेको निकै चाप हुने भएकोले प्रायः कर्मचारीहरु बिहान ९ बजेदेखि बेलुका अबेरसम्म पनि राहदानी वितरणको काम गर्दै आएका छन् । गत मंसिरमा सर्भरमा आएको समस्याका कारण राहदानी सेवा बन्द भएर १८ दिनपछि खुलेकाले सेवाग्राहीको चाप झन् बढेको प्रशासन कार्यालयले जनाएको छ । चापका कारण आएका सेवाग्राहीको समयमै पासपोर्ट बनाउन नसक्ने समस्या भएको प्रशासन कार्यालयले जनाएको छ ।