पाल्पा — सुन्तलाको पकेटक्षेत्र पाल्पाको रैनादेवी छहरा–५ मुझुङ्को कटौजेपानीमा शनिबारदेखि दोस्रो सुन्तला महोत्सव सुरु भएको छ । 

महोत्सवको लुम्बिनी प्रदेशका सभामुख तुलाराम घर्तीले उद्घाटन गर्दै सुन्तला उत्पादन हुने क्षेत्रलाई पकेट क्षेत्रका रुपमा विकास गर्दै युवाको विदेश पलायनलाई रोक्न सुन्तला खेती उपयुक्त हुने बताए । पाल्पासँगै छिमेकी गुल्मी र अर्घाखाँची, प्युठानका विभिन्न स्थानमा सुन्तला खेती हुने र यस क्षेत्रलाई करिडोरका रुपमा लैजानुपर्नेमा जोड दिए । 

महोत्सवमा सुन्तलाको उत्पादनमा विविधिकरणअन्तर्गत वाइन, घरेलु मदिरा, जुस, जाम, मिठाई, जेली लगायतका समानहरु निर्माण गरी प्रदर्शन तथा बिक्री गरिएको छ । 

कृषि ज्ञान केन्द्र, सुन्तला जात फलफूल विकास केन्द्र, प्रधानमन्त्री कृषि आधुनिकीकरण परियोजना, सुन्तला जोन कार्यालयले सुन्तला रोप्ने क्षेत्रको माटो परीक्षण, रोग किरा नियन्त्रण, सुन्तला खेतीसम्बन्धी आवश्यक परामर्श तथा जानकारी दिइएको छ । तर किसानको आकर्षण भने महोत्सवमा देखिएन । 

एक हजार बढी किसानले सुन्तला खेती गर्ने र यस क्षेत्रबाट न्यूनमात्र किसानले माटो परीक्षणलगायत परामर्शका लागि आएका थिए । किसानलाई बिरुवा लगाउँदा, काँटछाँट गर्दा अपनाउनु पर्ने सावधानी, सुन्तला बगैंचाको हेरचाह तथा मलखाद प्रयोगसम्बन्धी कृषि प्राविधिकहरुले किसानलाई जानकारी गराएको महोत्सव आयोजक कमिटीका संयोजक दानबहादुर कुँवरले बताए ।

सुन्तला खेती गरेर गाउँघरमै वार्षिक लार्खौं कमाई हुने र बसाइँसराईसमेत रोक्न सकिने रैनादेवी छहरा गाउँपालिकाका अध्यक्ष रुक्मांगत भट्टराईले बताए । रैनादेवी छहरा गाउँपालिकाले चालु आर्थिक वर्षमा ३० हजार सुन्तलाका बिरुवा अनुदानमा दिएको उनले बताए । रिब्दिकोट गाउँपालिकाका अध्यक्ष नारायणबहादुर कार्कीले गतवर्ष गरेको सुन्तला महोत्सवका कारण मैनादी क्षेत्रमा २२ घरपरिवार बसाइँसराई रोकिएको बताए । 

रिब्दीकोट गाउँपालिकाकी उपाध्यक्ष कान्ता अधिकारीले सुन्तला खेती गरेर धेरैले नगद कमाई गर्न सफल भएको बताए । रिब्दीकोट गाउँपालिकाका प्रमुख प्रशासकीय अधिकृत लेखनाथ पोखरेलले किसानलाई उत्साह जगाउन महोत्सव सफल हुने विश्वास लिएको बताए । 

सुन्तला महोत्सवमा २५ वटा स्टल रहे पनि कतिपय स्टल खाली रहेको छ । मुझुङ र अमलावासका किसानले सुन्तला बिक्री गर्न ल्याए पनि मैनादी क्षेत्रबाट ल्याइएको थिएन । दुबै गाउँपालिकाको आयोजनामा मुझुङको कटौजेपानीमा सुन्तला महोत्सव आयोजना गरेको हो । 

लुम्बिनी प्रदेशसभा सदस्य बीरबहादुर रानाले सुन्तला किसानको समस्या बुझ्दै यसको प्रचारप्रसार र प्रवर्द्धनमा पालिकाले खेलेको भूमिका महत्वपूर्ण हुने बताए । लुम्बिनी प्रदेशसभा सदस्य रामजी घिमिरेले किसानको नगदेबाली सुन्तला भए पनि यसमा देखिएका समस्या समाधान गर्नमा सरोकारवाला निकायको ध्यान नपुगेको गुनासो आउन नहुने बताए ।