पाल्पा — तिनाउ गाउँपालिका–२ र ३ जोड्ने तिनाउ खोलामा बनेको पक्की पुल जोखिममा परेको छ । निर्माण व्यवसायीले वर्षाको समयमा बक्स कल्भर्ट निर्माणको काम अलपत्र छाड्दा तिनाउ खोलामा निर्मित पक्की पुल जोखिममा परेको हो । 

सिद्धार्थ राजमार्गको दोभान बजारदेखि चुनुमाया पार्क जाने बक्स कल्भर्ट निर्माणका लागि द लुम्बिनी निर्माण सेवाले गत वैशाख १६ गते ठेक्का सम्झौता गरेको हो । बक्स कल्भर्ट निर्माणका लागि सडक चौडा गरेर अलपत्र छाडेपछि वर्षायामको भेलले तिनाउ खोलामा निर्मित पक्की पुलतर्फ लेदो र गेग्र्यान बगाएर लगेपछि जोखिममा परेको तिनाउ गाउँपालिका अध्यक्ष प्रेम श्रेष्ठले बताए । 

यो पक्की पुल भएर दोभानका विभिन्न स्थानका साथै कचल, जुठापौवा, ठिमुरे लगायतका स्थानमा आवातजावत हुन्छ । गाउँपालिका पहुँचमार्ग भएकाले पनि यस पुल जोखिममा पर्दा चासो बडेको अध्यक्ष श्रेष्ठले बताए । सामान्य पानी पर्दासमेत पक्की पुलमा माथिल्लो भागबाट ढुंगामाटोसहितको लेदो पस्ने गरेको छ । 

पक्की पुल हिलाम्मे हुने र साना सवारीसाधनसमेत गुडाउन मुस्किल पर्ने गरेको स्थानीय तोया लम्सालले बताए । माथिल्लो भागबाट नालीसमेत राम्रो बनेको छैन । जसले गर्दा वर्षा हुनासाथ भेल बगेर पुलमा जानेगर्छ ।