विराटनगर — नेकपा एमाले र नेपाली कम्युनिस्ट पार्टीबीच नयाँ सत्ता समीकरण बनाउने सहमतिसँगै कोशी प्रदेशको नेतृत्व कसले गर्ने भन्ने विषय फेरि चर्चा सुरु भएको छ । एमालेकै नेतृत्वमा सरकार रहने भागबन्डापछि वहालवाला मुख्यमन्त्री हिक्मतकुमार कार्कीलाई निरन्तरता दिने वा नयाँ अनुहार अघि सार्ने भन्ने निर्णय पार्टी नेतृत्वको हातमा पुगेको छ ।

एमाले र नेकपाबीचको सहमतिअनुसार एमालेले कोशी, बागमती र लुम्बिनी प्रदेश सरकारको नेतृत्व गर्नेछ भने कर्णाली र सुदूरपश्चिम प्रदेश नेकपाको भागमा परेको छ । त्यससँगै कोशीमा सरकार पुनर्गठनको तयारी सुरु भएको छ । एमाले कोशीका प्रमुख सचेतक रमेश बस्नेतका अनुसार नयाँ परिस्थितिपछि मुख्यमन्त्री कसलाई बनाउने भन्ने विषयमा छलफल सुरु भइनसकेको बताए । उनका अनुसार पछिल्लो घटनाक्रमबारे पार्टी प्रदेश कमिटीमा छलफल भएको छैन । व्यक्तिका बारेमा केन्द्रले टुंगो लाउने हो या प्रदेशले सिफारिस गर्नुपर्ने हो त्यो पनि थाह नभएको उनले जनाए । ‘प्रदेशलाई टुंग्याउने जिम्मा दिएमा पुरानैलाई निरन्तरता दिइने सम्भावना प्रवल छ’, उनले भने, ‘केन्द्रबाट भए भन्न सकिन्न ।’ 

एमाले उच्च स्रोतका अनुसार केन्द्रीय नेतृत्वले कोशीमा नेतृत्व परिवर्तनको विकल्प गम्भीर रूपमा छलफल गरिरहेको छ ।खासगरी एमाले अध्यक्ष केपी शर्मा ओलीसँग मुख्यमन्त्री तथा सचिव कार्कीको पछिल्लो सम्बन्ध खास सुखद् नरहेको एमाले स्रोतले जनाएको छ । ‘त्यस अर्थमा अध्यक्ष (ओली) ले कार्कीलाई रिप्लेस गर्ने सम्भावना बलियो देखिन्छ’, एक सांसदले भने । 

यदि नेतृत्व परिवर्तन भयो भने एमाले संसदीय दलका उपनेता तिलकुमार मेन्याङ्बो सबैभन्दा बलिया दाबेदार देखिएका छन् । कार्कीपछि प्रदेश संसदीय दलका वरिष्ठ नेता रहेका मेन्याङ्बो एमाले संसदीय दलका उपनेता हुन् । ताप्लेजुङ १ (१) बाट निर्वाचित उनी हिक्मतकुमार कार्की नेतृत्वको पहिलो प्रदेश सरकार (२०७९ पुस २५ देखि २०८० असार २२ सम्म) खानेपानी, सिंचाइ तथा ऊर्जामन्त्री बनेका थिए । मन्त्रिपरिषद् पुनर्गठनका क्रममा उनले केही समय स्वास्थ्य मन्त्रालयको जिम्मेवारी पनि सम्हालेका थिए । त्यसअघि उनी २०५६ सालमा ताप्लेजुङबाट प्रतिनिधिसभा सदस्यमा निर्वाचित भई राष्ट्रिय राजनीतिमा पनि सक्रिय भूमिका निर्वाह गरिसकेका छन् ।