प्रतियोगितामा एसीआर दोजाङले ११ स्वर्ण, १० रजत र ६ कास्य पदक जित्दै पहिलो स्थान हासिल गरेको हो ।
पाँचथर — पाँचथरमा आयोजित जिल्ला तेक्वान्दो च्याम्पियनसिप प्रतियोगितामा एसीआर दोजाङ समग्र च्याम्पियन बनेको छ ।
प्रतियोगितामा एसीआर दोजाङले ११ स्वर्ण, १० रजत र ६ कास्य पदक जित्दै पहिलो स्थान हासिल गरेको हो । इगल दोजाङ ५ स्वर्ण, ७ रजत र ७ कास्य पदकसहित दोस्रो तथा याङवरक दोजाङ ३ स्वर्ण, १० रजत र ५ कास्य पदकसहित तेस्रो बनेको छ ।
तेक्वान्दो संघ नेपाल जिल्ला कार्यसमिति पाँचथरको आयोजनामा फिदिममा सम्पन्न दुईदिने प्रतियोगितामा जिल्लाका १ सय १० खेलाडी सहभागी भएका थिए ।
संघका जिल्ला अध्यक्ष सन्तोष श्रेष्ठले युवापुस्तालाई कुलतबाट जोगाउँदै खेलकुदतर्फ आकर्षित गर्नु, सामाजिक सञ्जालमा बढी अभ्यस्त बन्दै गएकाले खेलमार्फत अनुशासित र सक्रिय बनाउन प्रतियोगिता गरिएको बताए ।
जिल्लास्तरीय प्रतियोगिताले खेलाडीको क्षमता अभिवृद्धिसँगै प्रदेश तथा राष्ट्रिय प्रतियोगिताका लागि प्रतिभा पहिचान गर्न योगदान पुग्ने आयोजकले जनाएको छ ।
