खोटाङ — जिल्ला खेलकुद विकास खोटाङमा खेलकुद बजेटमा अनियमितता भएको खुलासा भएको छ । १० औं राष्ट्रिय खेलकुद प्रतियोगिताको तयारीका लागि कोशी प्रदेश खेलकुद विकास बोर्डले पठाएको बजेटमा अनियमितता भएको खुलासा भएको हो ।

जिल्ला खेलकुद विकास समिति खोटाङका निवर्तमान अध्यक्ष रमेश राई ‘महेश’ र कार्यालय प्रमुख लिलाभक्त केसीको मिलेमतोमा कोशी प्रदेश खेलकुद विकास बोर्डले पठाएको ८ लाख मध्ये ६ लाख ७६ हजार दिक्तेलस्थित कृषि विकास बैंकमा रहेको खाताबाट निकालेको खुलासा भएको हो । उक्त रकम विभिन्न समय निकासा भएको देखिन्छ ।

१९ माघ २०८१ मा ३८ हजार, सोही वर्षको ११ चैतमा एक लाख २५ हजार, ३१ चैतमा ४ लाख २० हजार, २३ वैशाख २०८२ मा १० हजार, सोही वर्षको ११ साउनमा ४३ हजार र ११ माघमा ४० हजार ६ लाख ७६ हजार निवर्तमान अध्यक्ष राईको नाममा निकासा भएको देखिन्छ ।

यसमध्ये ६ लाख ५६ हजार निवर्तमान अध्यक्ष राईले पेश्की वापत लिएको र २० हजार ट्र्याकसुट खरिदमा खर्च भएको कार्यालय प्रमुख लीलाभक्त केसीले बताए । अन्य एक लाख ४४ हजार भने असार २०८१ मा बुइपामा भएको प्रदेशस्तरीय महिला फुटबल प्रतियोगितामा खर्च भएको केसीले बताएका छन् ।

१० औं राष्ट्रिय खेलकुद प्रतियोगिता रद्द भएपछि रकम चलाएको केसीले बताए । उक्त रकम जिल्ला खेलकुद विकास समिति खोटाङको खातामा फिर्ता भएपछि प्रदेश खेलकुद विकास बोर्डलाई फिर्ता गर्ने समेत केसीले सुनाए । ‘१० औं राष्ट्रिय खेलकुद प्रतियोगिताको तयारीका लागि प्रदेश खेलकुद विकास बोर्डले ८ लाख पठाएको थियो, खेल रद्द भएपछि पेश्की वापत अध्यक्षज्यूले लिनु भएको हो,’ केसीले भने, ‘उहााले फिर्ता गर्छु भनिरहनु भएको छ, फिर्ता भएपछि प्रदेश खेलकुद विकास बोर्डलाई फिर्ता गछौं ।’