धनकुटा — धनकुटा नगरपालिकाले सार्वजनिक यातायात क्षेत्रमा सक्रिय रूपमा कार्यरत नगरकी एक्ली महिला टेम्पो चालकलाई सम्मान र नगद पुरस्कार प्रदान गरेको छ।

नगरपालिकाले धनकुटा नगरपालिका–७ टोमुवाकी ३६ वर्षीया तृष्णा राईलाई नगद ६ हजार रुपैयाँसहित सम्मान गरेको हो। जिल्ला समन्वय समिति धनकुटाकी उपप्रमुख सावित्रा राई तथा धनकुटा नगरपालिकाकी उपप्रमुख भीमादेवी खनाल लगायतले सम्मानपत्र र नगद हस्तान्तरण गरेका हुन्।

नगरपालिकाले सार्वजनिक यातायात सेवामा एकमात्र महिला सवारी चालकका रूपमा सक्रिय भूमिका निर्वाह गर्दै महिलाको रोजगारी, आत्मनिर्भरता तथा सशक्तीकरणमा महत्त्वपूर्ण योगदान पुर्‍याएको भन्दै राईलाई सम्मान गरिएको जनाएको छ।

विगत दुई वर्षदेखि टेम्पो चालकका रूपमा कार्यरत राईले घरखर्च व्यवस्थापनका लागि ३ लाख ५० हजार रुपैयाँ लगानी गरी टेम्पो खरिद गरेर व्यवसाय सुरु गरेको बताइन्। टेम्पो सञ्चालनबाट मासिक ३५ हजारदेखि ४० हजार रुपैयाँसम्म आम्दानी हुने गरेको उनको भनाइ छ।