खोटाङ — नेपाल पत्रकार महासंघ खोटाङले ६५ वर्ष पूरा गरेका पत्रकारलाई पेन्सनको व्यवस्था गर्ने भएको छ । २५ वर्ष पत्रकारिता गरी ६५ वर्ष पूरा भएकालाई अब पेन्सनको व्यवस्था गर्ने भएको हो ।

कृष्ण आचार्यको संयोजकत्वमा बनेको मस्यौदा समितिले ज्येष्ठ नागरिक पेन्सन कोष सञ्चालन तथा व्यवस्थापन कार्यविधि तयार गरी शनिबार नेपाल पत्रकार महासंघ खोटाङ शाखालाई बुझाएको छ । उक्त मस्यौदामा कम्तीमा १० लाखको अक्षयकोषबाट मूल धन नमासिने गरी त्यसको ब्याजबापत आउने रकमबाट प्रतिव्यक्ति मासिक ३ हजार रुपैयाँका दरले पेन्सनको व्यवस्था गर्ने उल्लेख छ । 

जिल्लामै रहेर काम गरेका पत्रकारलाई मात्र पेन्सन दिइने मस्यौदामा उल्लेख छ । कुनै राजनीतिक दल वा पेसागत संस्थाको कार्यकारी पदमा बहाल रहेको व्यक्ति, सूचना तथा प्रसारण विभाग वा प्रेस काउन्सिल नेपालको कालो सूचीमा परेको व्यक्ति, नैतिक पतन ठहरिने गरी फौजदारी अपराधमा दोषी ठहर भएकाले उक्त पेन्सन नपाउने मस्यौदामा उल्लेख छ ।