संखुवासभा — संखुवासभाको खाँदबारीस्थित जिल्ला अस्पतालले पहिलोपटक हेमोडायलासिस सेवा सञ्चालन गरेको छ। शुक्रबार पहिलो पटक खाँदबारी नगरपालिका–९ की बोल्न नसक्ने बिरामी खुसकुमारी श्रेष्ठको सफल डायलासिस गरिएको छ। 

४७ वर्षीया श्रेष्ठ विगत डेढ वर्षदेखि विराटनगरस्थित नोबेल अस्पतालमा नियमित डायलासिस सेवा लिँदै आएकी थिइन्। आर्थिक, भौगोलिक तथा पारिवारिक कठिनाइका कारण टाढा पुगेर उपचार गराउनु उनका लागि चुनौतीपूर्ण बनेको थियो। आफ्नै जिल्लामा सेवा उपलब्ध भएपछि उनले सहज रूपमा उपचार पाउने आशा लिएको श्रीमान्‌ले सुमन पराजुलीले बताए । 'मिर्गौला रोगीहरूका लागि नयाँ आशा जगाएको छ,' पराजुलीले भने, 'पहिलोपटक आफ्नै जिल्ला अस्पतालमा डायलासिस गराउँदा हामी निकै खुसी छौं ।'

जिल्ला अस्पताल खाँदबारीमा हेमोडायलासिस सेवा सुरु गर्न आवश्यक पूर्वाधार, जनशक्ति र उपकरणको व्यवस्था गरिएको छ। अस्पतालका अनुसार संखुवासभामा १ सय बढी मिर्गौला रोगी छन् । अस्पतालमा हाल ५ वटा डायलासिस मेसिन जडान गरिएको छ, दैनिक रूपमा धेरै बिरामीलाई सेवा दिन सक्ने क्षमता राख्ने अस्पतालका प्रमुख डा सन्तोष देवले बताए । 'यो सेवाको सुरुवातसँगै संखुवासभा मात्र नभई आसपासका जिल्लाका बिरामीहरूलाई समेत लाभ पुग्ने अपेक्षा गरिएको छ,' उनले भने, 'सेवा सञ्चालनका लागि आवश्यक दक्ष जनशक्ति तयार पार्न विशेष ध्यान दिएका छौं ।'