धनकुटा — सबैले ‘लैंगिक हिंसा अपराध हो, यसका विरुद्ध बोलौं’ यही नारा लेखिएको टि–सर्ट लगाएका थिए । विद्यालय तहमा लैंगिक हिंसाविरुद्ध सचेतनामूलक अभियानमा जुट्ने तयारीमा रहेका धनकुटा नगरपालिकाभित्रका २३ किशोरकिशोरी यसरी एकजुट भएका हुन् ।

बढ्दो हिंसाजन्य घटनाका विरुद्ध धनकुटाका किशोरकिशोरीले अब आ–आफ्ना विद्यालयमा अगुवाइ गर्ने भएका छन् । उनीहरू धनकुटा नगरपालिकाबाट लैंगिक हिंसाबारे सचेतना तथा सामाजिक र वित्तीय सीप हस्तान्तरणका लागि प्रशिक्षक तालिम लिएपछि अभियानमा जुट्न लागेका हुन् ।

महिला, बालबालिका तथा ज्येष्ठ नागरिक मन्त्रालयको कार्यान्वयन र विश्व बैंकको आर्थिक अनुदान सहयोगमा तालिम सञ्चालन गरिएको थियो । धनकुटा नगरपालिकाले नगरभित्रका २३ किशोर तथा किशोरीलाई सहभागी गराएर सामाजिक र वित्तीय सीप रुपान्तरण सम्बन्धित आठदिवसीय प्रशिक्षक प्रशिक्षण तालिम दिएको हो । लैंगिक हिंसा रोकथाम तथा प्रतिकार्यका लागि एकीकृत सेवा पहुँच परियोजनाअन्तर्गत तालिम सञ्चालन गरिएको परियोजनाका व्यवस्थापक खिन्द्र अधिकारीले बताए । 

यसरी तालिम लिएका किशोरकिशोरी अब विद्यालयमा फर्किएर आफ्ना सहपाठीलाई लैंगिक हिंसासम्बन्धी तालिम दिने परियोजना कार्यान्वयन इकाइका विज्ञ नुषराज श्रेष्ठले बताए । ‘घरेलु तथा महिला लगायत सबै प्रकारका लैङ्गिक हिंसा न्यूनीकरणका लागि किशोरकिशोरीलाई प्रशिक्षक प्रशिक्षण तालिम दिइएको हो,’ उनले भने, ‘नवयुवाहरूमा सचेत गराउन किशोरकिशोरी जुट्ने छन् । यसपछि पुनः अर्को चरणको तालिम दिएपछि उनै किशोरकिशोरी आफ्ना समुदायमा लैंगिक हिंसाविरुद्ध सचेतनामूलक अभियानमा जुट्ने छन् ।’  

धनकुटा नगरपालिकाभित्रका नौ सरकारी विद्यालयका किशोरकिशोरी तालिममा सहभागी थिए ।  तालिममा सहभागी निकिता विश्वकर्माले लैंगिक हिंसाबारेमा स्पष्ट भएकाले अब आफू र आफ्ना साथीसंगीलाई यसबारे तालिम दिने बताइन् । अर्की सहभागी प्रशन्ना अधिकारीले भनिन्, ‘अधिकांशले लैंगिक हिंसाबारे जानकारी नपाएकै कारण समस्या भोग्नुपरेकाले यसको न्युनीकरणमा हामी जुट्ने छौं ।’