धरान — यहाँस्थित बीपी कोइराला स्वास्थ्य विज्ञान प्रतिष्ठानले क्यान्सर उपचारसम्बन्धी सामाजिक सञ्जालमा फैलाइएको भ्रामक सूचनाप्रति गम्भीर ध्यानाकर्षण भएको जनाएको छ।

प्रतिष्ठानले विज्ञप्ति जारी गर्दै क्यान्सर उपचार हुँदैन वा सेवा गुणस्तरहीन छ भन्ने प्रचार पूर्ण रूपमा गलत र भ्रामक भएको स्पष्ट पारेको छ । यस्ता सूचनाले बिरामी र सर्वसाधारणमा अन्योल सिर्जना गर्नुका साथै स्वास्थ्य सेवाप्रति अविश्वास बढाउने खतरा रहेको उल्लेख गरिएको छ।

प्रतिष्ठानका अनुसार केही निहित स्वार्थ समूहले क्यान्सर विशेषज्ञ चिकित्सकमाथि आधारहीन आरोप लगाउँदै संस्थाको छविमा आँच पुर्‍याउने प्रयास गरिरहेको दाबी पनि गरेको छ। यस्ता गतिविधि रोक्न र यथार्थ जानकारी सार्वजनिक गर्न आफूहरू बाध्य भएको जनाइएको छ ।

प्रतिष्ठानले स्थापनाकालदेखि नै क्यान्सर उपचार सेवा दिँदै आएको र पूर्वी नेपालमै पहिलोपटक क्यान्सरसम्बन्धी शल्यक्रिया सुरु गरेको दाबी गरेको छ । हाल क्यान्सर उपचारका प्रमुख दुई आधार शल्यक्रिया र सिस्टेमिक थेरापी (किमोथेरापी, हर्मोनल तथा टार्गेट थेरापी) प्रभावकारी रूपमा सञ्चालनमा रहेको प्रतिष्ठानका प्रवक्ता प्राडा शमशेर श्रेष्ठले बताए । साथै, निकट भविष्यमा रेडियोथेरापी सेवा सुरु गर्ने तयारी भइरहेको पनि उनले जानकारी दिए।