सुनसरी — कोशी मिडिया समिट पत्रकारिता, विज्ञापन बजार तथा सञ्चार उद्योगका विविध पक्ष समेट्दै १४ बुँदे 'कोशी घोषणापत्र’ जारी गर्दै सम्प्न भएको छ । 

नयन एड्भरटाइजिङ मिडिया प्रालिको आयोजनामा तथा नेपाल पत्रकार महासंघ कोशी प्रदेशको सहकार्य र महासंघ सुनसरीको संयोजनमा इटहरीमा समिट आयोजना गरिएको थियो । जारी घोषणापत्रमा नेपाल सरकारअन्तर्गत संघीय, प्रदेश र स्थानीय तहले संविधानले सुनिश्चित गरेको प्रेस तथा अभिव्यक्ति स्वतन्त्रताको प्रभावकारी कार्यान्वयनमा भूमिका सुदृढ गर्नुपर्नेमा जोड दिइएको छ । साथै पत्रकारमाथि हुने आक्रमण र धम्कीका घटनामा संलग्नलाई कडा कारबाही गर्दै पत्रकार सुरक्षाको ग्यारेन्टी गर्न सरकारसाग माग गरिएको छ । 

घोषणापत्रले सूचना विभागबाट वितरण हुने प्रेस पासलाई सहज बनाउने, दुरुपयोग रोक्ने तथा सम्पादकीय स्वतन्त्रता सुनिश्चित गर्नुपर्ने आवश्यकता औंल्याएको छ । मर्यादित पत्रकारिताको विकासका लागि प्रेस काउन्सिल नेपालको भूमिका अझ प्रभावकारी बनाउनुपर्नेमा समेत जोड दिइएको छ ।

'मिस इन्फर्मेसन’ र 'डिस इन्फर्मेसन’ बढ्दै गएको सन्दर्भमा पत्रकारहरूलाई जिम्मेवार र विश्वसनीय बन्न आग्रह गर्दै आचारसंहिताको पूर्णपालना र समयानुकूल परिमार्जन आवश्यक रहेको निष्कर्ष निकालिएको छ । सूचना प्रविधिको तीव्र विकाससँगै पत्रकारिताको स्वरूप परिवर्तन भइरहेकाले यसबारे नयाँ बहस आवश्यक रहेको पनि समिटले औंल्याएको छ । 

त्यस्तै, सामाजिक सञ्जाल, कन्टेन्ट क्रिएटर र पत्रकारबीचको भिन्नता स्पष्ट पार्न मिडिया साक्षरता अभियान सञ्चालन गर्नुपर्नेमा जोड दिइएको छ । सरकारी विज्ञापन वितरणलाई समानुपातिक र समावेशी बनाउन, संकटमा रहेका सञ्चारगृहलाई अनुदान तथा सहुलियत ऋण उपलब्ध गराउन माग गरिएको छ ।

घोषणापत्रमा लोककल्याणकारी विज्ञापनमा कर छुट, श्रमजीवी पत्रकार ऐनको प्रभावकारी कार्यान्वयन, सञ्चारगृहलाई सामाजिक सुरक्षा कोषमा आवद्ध गराउने लगायत विषय समेटिएका छन् । साथै लोकतन्त्र, मानवअधिकार र प्रेस स्वतन्त्रताको संरक्षणका लागि पेशागत संगठनहरूलाई सशक्त बनाउने प्रतिबद्धता व्यक्त गरिएको छ ।